Shillong, Risaw 26 : U Symbud Myntri Rangbah ka Jylla ba khmih ia ka kam pohiing (Police) Bah Prestone Tynsong ha ka sngi Palei, ula pyntip ba ka Sorkar Jylla kan sa khot ia ka Harijan Panchayat Committee (HPC) ha u bnai ban wan ban iakren ha kaban iapynbeit noh ia ka kam ba iadei bad ka jingpynkynriah ia ki 342 tylli ki longiing na Them Metor.
“Ngin sa shong sa kawei ka jingialang bad ka HPC. Namar ka jingwan ka puja, kumta ngi kyrmen ba ha u bnai ban wan ngin sa lah ban khot noh ia ki ban iakren pynbeit khatduh bad ngi sa aiti ia ka affidavit sha ka Iingkashari” ong u Bah Prestone haba iakren bad ki nongthoh khubor.
Ha ka 29 tarik Nailur, ka Sorkar Jylla kala pyntip sha Iingkashari ba kala mynjur ban pynheh ia ka jingai jaka jong kawei pa kawei ka longiing kumba la kyrpad da ki nongshongshnong ka Them Metor.
