Shillong, Jymmang 21 : Ka Iingkashari Meghalaya High Court kala buh ia ka 12 tarik Jylliew kum ka sngi ban shong bishar biang ia ka Public Interest Litigation (PIL) ba iadei bad ka jingithuh ia ki jaka shong madan.
Ha ka hukum ba pynmih ha ka sngi Balang, ka Iingkashari ba kynrhup ia u Chief Justice IP Mukerji bad Justice W Diengdoh ula ong ba kane ka PIL ka kynthup ia ka jingithuh ia ki jaka ban pynlong iew madan, ban pynkynriah jaka bala ai jingbit ban pyndonkam ha kaban shong dukan madan, ka jingpyniaid kali, ka jingai jaka pynieng kali, ban pynkylluid katba lah ia ka surok khnang ban kylluid ka iaid ki kali bad ban pyntreikam ia ki Polici bad ki plan ban pynlong ia ka Nongbah ka Meghalaya-Shillong, ka Sor kat kum ka juk, ka sor kaba khuid bad kaba lah ban pyniaid bha.
Halor ka jingkyrpad bala buh da u nongmudui, ka Iingkashari kala ong “Hynrei, kum ka jingailad ba khatduh ngi ailad ia u nongmudui ban wanrah sha ka jingpyntip jong ka Iingkasahri lada don kano kano ka jingduna ha ka kaiphod bala aiti da ka Sorkar da kaba pynjlan ia ka por ban file ia ka affidavit haduh ka 2 tarik Jylliew, 2025. Buh ban bishar ia kine ki artylli ki writ petition ha ka 12 tarik Jylliew 2025”.
