Shillong, Rymphang 20 : U Myntri ka Tnad Pule ka Jylla Rakkam A Sangma ha ka sngi Ba-ar, ula pyntip hapoh ka Iingdorbar ba ka jingtei jong ka Science & Commerce College ha Mawphlang, kan sa dep noh ha u bnai Jylliew mynta u snem.
Haba jubab hapoh Iingdorbar, u Rakkam ula ong “Ka jingshim klas kan sdang hadien bala pyndep ia ka jingtei bad ka jingthung ia ki nonghikai bad ki nongtrei”.
U pyntip ba ka jingtei mynta kala iaid kumba 72 percent. Ia kane ka project la mang pisa T.36.55 klur ha ka 30 tarik u Jylliew 2017 bad haduh mynta la pynlut kumba T.14.815 klur sha ka project.
U MLA ka Mawphlang Matthew B Kurbah ula buh jingkylli la ka long kaba lah ban pyndep ia ka project ha u Jylliew naba ym shym la paw ba iaid ka kam ha kane ka jaka. Ula kyntu ia ka Sorkar ba kan pynkloi ia ka jingpyllait ia ka pisa ban lah pyndep noh mar mar ia ka project.
Halor kane, u Rakkam ula ong ba shuwa kane, ia kane ka project la buh ban pyndep hapoh u snem 2020 hynrei la pynslem noh ia ka namar ka jingslem ban aiti ia ka jaka bad ka jingpyllait ia ka 2nd installment bad kumjuh ruh ka jingwan ka khlam Covid-19.
Hynrei ula pyntip ba dang hynnin ka sngi, la pyllait ia ka 2nd installment sha ka agency ba pyntrei ia kane ka project ba kan lah pyndep noh. “Namar kata, ngi la khmih lynti ban pyndep ia ki kam hapoh ka por bala buh”.
