Shillong, Jymmang 04: U chairman ka Regional Committee ba dei khmih iaka West Khasi Hills bah Paul Lyngdoh hynne ka sngi ula pyntip ba ka jingpynrung dkhot hapoh ka Committee ka dang iaid shakhmat bad ia kane yn pyndep ha u bnai ban wan.
Haba kren sha ki lad pathai khubor u bah Paul ula iathuh ba ula dep ban iakren bad Deputy Commissioner (DC) ka West Khasi Hills haba iadei bad kane ka mat.
“Ia ka ba mynta ngi dang pynkhreh ban pynrung dkhot hapoh ka Committee namar bun ki dkhot barim kiba don ha kane ka Committee kim don bynta shuh namar kidei ki MLA barim bad dei namar kane nga kyrmen ba ha u bnai ban wan, ngin biang ha ka jingdon ki briew ki ban dei dkhot ha kane ka Committee naka bynta ban sdang noh iaki kam” la ong u bah Paul.
Kumban shu pynkynmaw ba iaka Regional Committee West Khasi Hills la thaw biang ha u bnai Lber 2023 naka bynta ban sdang noh ka jingiakren pynbeit pud haka wat ba ar hapdeng ka Meghalaya bad Assam.
Haba kylli haduh katno kan eh ban pynbeit pud hapoh ka thain Langpih, u bah Paul ula ong “Haba don ka jingeh, ngi ialeh ban wanrah ka jingpynbeit bad nga kyrmen ba ka jingpynbeit kan kham heh ban iaka jingeh”.
Lah ban kdew ba dangshen u Myntri Rangbah ka jylla Conrad K Sangma ula pyntip ba ka jingiakren pynbeit pud haka wat ba ar hapdeng ka Meghalaya bad Assam kan sdang noh mynta u bnai Jymmang.
