Shillong, Jymmang 22 : Ka jingpyni paidbah ia ka Documentary Film kaba la ioh jingiaroh ba la ai kyrteng “Because We Did Not Choose” kaba la shna bad pynwandur da u Wanphrang D. Diengdoh, yn pyni paidbah ha Tura District Auditorium ha ka 24 tarik u Jymmang.
“Kane ka phlim kadei kaba batai shaphang ki khana halor jongki Indigenous Labour Corps ka thain shatei lammihngi ka ri India kiba la shah pynrungkam ha ka sorkar Bilat ha ka por jongka thma Bah kaba Nyngkong. Napdeng kine ki kynthup ia ki Garo Labour Corps, kiba len lade bad shakri shabar ri hynrei kidei pat kiba la lah klet ha ki khana histori. Ka jingpyni ia kane ka phlim ka long ban pynsaphriang ia ki khana jongki bad kumjuh ban pynsngewthuh shaphang ka histori sha ki paid nongshong shnong ka jylla khamtam ia ki samla” la ong u Cherian Momin uba la mihkhmat ia ka Joint NGOs Forum, Tura.
Ula ong, ba kane kadei ruh kum shi bynta jong ka ‘Collective Cultural Movement’ ban kynmaw burom ia ki Garo Labour Corps bad ban pynphai kylla ha kaba iadei bad ka jingshah pynpra ia u mot sahnam uba don ha Tura. Da kaba pynkhie im ia ka histori lyngba ki jingring dur bad ki khana, kane ka phlim kan ai ia ka rynsan ban phalang ia ki jingmut jingpyrkhat bad ia ka burom.
“Ia kane ka jingpyni ia ka phlim kadei kaba la kyrshan da ka sorkar jylla bad khlem ka jingiarap ka jongka ngin ym la lah ban pynlong ia kane. Ngi pynpaw ia ka jingsngewnguh kaba khraw ia u Myntri Rangbah ka jylla bad ia ka tnad kaba dei khmih halor ka jingbat ia ka jingkular ban pynneh pynsah bad ban kyntiew ia ka histori tynrai jong ki paid riewlum” ula ong.
Ula kyntu ruh ia ki paidbah, ki samla pule, ki rangbah, ki nonghikai bad ki nongwad bniah bad kumjuh ia ki lad pathai khubor ban wan ban peit ia kane ka phlim. Kane ka prokram kan kynthup ruh ia ka lad ban buh jingkylli bad ban ioh ia ka jingpynshai hadien ba la dep pyni ia ka phlim.
“To ngin ia wan lang ban kynmaw, ai burom bad ban ieng sngewlem bad kine ki longshwa ki jong ngi” la ong u Momin.
