Guwahati, K’lyngkot 07: Ki pulit ka Assam kila ong ba ia ka kawei ka longkmie 36 snem rta bad u khun jong ka kiba la jah rngai noh na Nagaon district ka Assam ha u bnai Naiwieng jong ka snem ba la dep la lapdien hapoh ka phatok ha Pakistan.
Ka Wahida Begum lem bad u khun ba dang 10 snem jong ka kila shah kem noh bad hadien kila shah set hapoh ka phatok ha Pakistan halor ka jingkynnoh wan rung beain sha kane ka ri.
Haba kren sha ki lad pathai khubor ka superintendent of police ka Nagaon, ka Leena Doley, ka la ong, “Ia kane ka briew ha kaba nyngkong la ialam shapoh Saudi Arabia da ka jingkular ban pyniathoh shongkurim da kaba pyndonkam ruh da ki kot ki sla kiba shu shna thok bad hadien la ialam ia ka sha Pakistan.Kane ka longkmie kaba la kylla long riewkynthei naduh kine ki ar snem ba la dep kala die noh iala ki jong ki jingdon jingem bad mih noh na Nagaon ha u bnai Naiwieng ba la dep ha ryngkat uwei u briew uba ka la iakynduh dang shen da ka jingkular ban iathoh shongkurim bad ka.
“Kiba haiing hasem kila ioh jingtip halor ka jaka kaba ka don ha une u bnai ba la dep hadien ba ka kmie jong katei ka riewkynthei kala ioh pdiang ia ka shithi na ka tnat ain ha Pakistan kaba la pyntip ba ka khun jong ka bad u ksiew jong ka ki don hapoh ka district jail jong ka Baluchistan ha Quetta, Pakistan.
“Hadien ka kmie jong katei ka riewkynthei kala ujor sha ki bor pulit bad ioh pdiang ruh ia ka phone na ka khun jong ka kaba la pynthikna ia ka jaka kaba ka don,” ong ka SP ka thain.Kane ka heh pulit kala ong ruh ba la iohi ba kane ka briew ha ryngkat u khun jong ka nalor utei u briew uba la ialam ia ka na Nagaon sha Saudi Arabia kila shah kem noh ha Pakistan hadien ba kila pyrshang ban wan rung lyngba ki kot ki sla kiba shu shna thok.
Na ka liang ka kmie jong katei ka kynthei kala phah ruh da ka jingkyrpad sha ka iingbisahar Delhi High Court bad thoh ruh sha ka President Droupadi Murmu ban kyrpad ia ka jingiarap lem na ka bynta ban lah ban pynkynriah pat ia ka khun bad u ksiew jong ka.
Ha ka sngi Thohdieng ba la lah, ka High Court kala kyntait ia katei ka jingkyrpad da kaba ong ba kam shym la hap hapoh ka jaka khmih ka jong ka.Ka la kyntu ruh ia ka ba kan leit shapoh Gauhati High Court.Na ka liang ka nongkyrpad ka Azifa Khatun ka la kyntu ia ka sorkar ba kan tuklar mardor halor kane ka bynta na ka bynta ban ioh pyllait noh ia ki.
