Nongpoh, Naiwieng 14: Ka long ka sngi kaba kmen ym tang ia ki khynnah pule ka St. Anthony Secondary School, Kharpati hynrei ia ki bor pyniaid skul ruh kumjuh namar ha ka sngi rakhe ia ka Children’s Day hynne ka sngi, ki bor pyniaid skul ki la ioh ban plie noh ia ka iingskul kaba thymmai bad ka jaka leit bar kaba paka ba la tei lyngba ka MLA skhim lem ka jingianoh synniang lang da ki riew shimet.
Ha ka jingrakhe kaba kyrpang ia ka sngi pynburom ia ki khynnah pule, ki bor pyniaid ka St. Anthony Secondary School ki la ioh ban lehkmen ha ryngkat ka jingioh ban rung ha ka building kaba thymmai ia kaba la wan ban plie paidbah da u Bah Mayral Born Syiem, MLA ka Nongpoh kum u kongsan ha ka jingiadonlang ruh u Bah Robertus Rihon, Syiem ka Raid Kharpati, u Jayanta Mudoi, Bank Manager HDFC Bank, Nongpoh, ka Sr. Anima CM, Headmistress jong ka skul nalor ki kmie ki kpa bad kiwei kiwei.
Haba kren ha kane ka sngi, u Bah Mayral Born Syiem kum u nongmihkhmat paidbah ka thain Nongpoh, u la ai khublei kyrpang ia ki khynnah skul halor ka sngi burom ka jong ki bad u la ai jingiaroh ruh ia ki bor pyniaid skul ka St. Anthony SS kiba la lah ban pyndonkam hok ia ka jingpynmang ia ka skhim na ka bynta ban tei pyndep ia ka building ingskul kaba thymmai bad ia ka jaka leit bar kaba paka na ka bynta ka jingmyntoi jong ki khynnah bad ki nongpyniaid jong kane ka skul.
Nalor ka khubor kaba kyrpang halor ka sngi burom ia ki khynnah skul, u Bah Mayral Born Syiem, u la ai ka jingkren kaba kongsan ha kaba ia dei bad ka jingdonkam jong ki khynnah skul ban minot ia ki jingpule, ban burom bad kohnguh ia la ki nonghikai kiba dei ki kmie ki kpa ba-ar jong ki bad khamtam ban kiar ruh na ki jingmlien kiba sniew ki jingdih buaid bad ban kiar na u drok u ba la long u nongshun bakhraw jong ka shnong ka thaw ka imlang ka sahlang kaba la pynjot pynpra ia kiba bun ki samla bad ki iing ki sem.
La pynshongshit ia kane ka jingrakhe ia ka Children’s Day bad ka jingplie iingskul thymmai da ki jingshad jingrwai ba la shimbynta da ki khynnah skul bad ki nonghikai jong ka St. Anthony SS.
