Shillong, Nohprah 01: U Lat ka jylla u CH Vijayashankar hynne ka sngi u la leit shim bynta ha ka Governor’s Golf Cup bad sam khusnam sha ki nongjop.
Kane ka jingïalang kadei kaba la pynlong ha ka jaka ba itynnad bha ha Golf Links haka jingdon lang ki nong ïalehkai golf bad ki riew pawkhmat ban rakhe ïa ka mynsiem bad ka jingïadei paralok kum ki para nongialehkai.
Haba kren ha kane ka sngi, u Lat u la ai khublei ïa ki nongïashim bynta halor ki sap ialehkai ba kila pyni haba ban jur ia ka bynta jong ka jingïalehkai ha kaba pynroi ïa ka jinglong ryntih, ka jingïatylli, bad ka jingkoit jingkhiah.
U Lat u la ai khublei ruh ïa ki nongpynïaid kiba la kyntiew ïa ka nongbah Shillong kum ka jaka ïalehkai Golf kaba khring bad ban kyntiew ïa ka jingitynnad jong ka Jylla ha ka kam jngohkai pyrthei.
Haka sngi pynkut u Lat u la ai khusnam sha ki nongjop jong kane ka lympung, da kaba iaroh ia ki jinglehkai ba itynnad jong ki.
U Lat ka Jylla u la pynpaw ruh a ka jingdonkam jong kum kine ki jingïalehkai ban tehsong ïa ki jingïadei ha ka imlang sahlang bad ban ai mynsiem ïa ka jingtbit ha ka jingïalehkai.
Ha kane ka jingïalang la sakhi ïa ka jingïashim bynta kaba sngewtynnad, kaba la pynpaw ïa ka nam jong ka Shillong kum ka jaka ïalehkai Golf ba pawnam ha ka thaiñ Shatei Lam Mihngi.
