Shillong, Risaw 24 : Ka kyrtong ka National People’s Party (NPP) Dr Mehtab Chandee A Sangma, kala thep kyrteng hynne ka sngi Palei kum ka kyrtong ban aireng ha ka elekshon shiteng samoi ka Gambegre constituency.
La synran ia ka Dr Mehtab da u kurim Conrad K Sangma, uba dei ruh u Myntri Rangbah ka Jylla bad National President ka NPP.
Hadien ba dep thep kyrteng, ka Dr Mehtab kala ong ba baroh ki elekshon ki dei kiba iapher kawei na kawei pat hynrei kum ka party, kala pyrshang kat kaba lah ban iakynduh ia baroh ki nongthep vote.
Halor ki mat treikam ba hakhmat eh jong ka, ka Dr Mehtab kala ong “Ka kam ba hakhmat eh jong nga na ka bynta ka thain ka dei ka roi ka par. Ka Koit ka Khiah ruh kawei kawei na ki mat ba kongsan bha ia nga”.
Haba pynsngew ia kajuh ka jingsngew, u National President ka NPP Conrad K Sangma ula ong “Man ki elekshon ngi hap ban iakhun tyngeh, ngim lah ban shu khein sting ia ka. Baroh ki nongialeh pyrshah ki dei ki nongialeh pyrshah. Ngi hap ban pynthikna ba kum ka party ngin trei shitom. Ka kyrtong jong ngi kan hap ban trei shitom”.
Ha kajuh ka por, ula wer ia ki paidbah ka Gambegre constituency ban jied ia kaba dei. “Ka Gambegre constituency ka donkam shibun ki jingphaikhmat bad nga kyrmen ba ha kane ka eleshon, kin paidbah kin jied ia kaba dei ha kaban iadonlang bad ka liang Synshar bad ka Sorkar” ula ong.
Halor ka lad jingjop jong ka party bad ka jingkyrshan ki paidbah, ula ong ba ka Party kala ioh bha ia ka jingkyrshan bad ka kyrmen ba kan poi sha ka thong jong ka jingjop.
Nalor ka Dr Mehtab, u MDC ka Tura Bernard N Marak kyrtong ka BJP bad kumjuh ruh u Jingjang Marak kyrtong ka Congress, kiba pyndep ia ka jingthep kyrteng hynne ka sngi Palei.
Arngut ki kyrtong shimet kila pyndep ia ka jingthep kyrteng bad kine ki kynthup ia u Sengkrabirth Marak bad Jerry A Sangma.
Ka MDC kynthei ba marwei ka GHADC bad kyrtong ka Trinamool Congress Sadhiarani Sangma, kala pyndep ia ka jingthep kyrteng ha ka sngi Ba-ar.
