Tura, Naiwieng 13 : Ka jingiathep vote jong ka elekshon shiteng samoi ka Gambegre kala iaid beit iaid ryntih hynne ka sngi Balang bad ka jingpoi jong ki nongthep vote kiba la pyndep iala ka kamram bad jied ia ki nongmihkhmat kala kot ia ka 90.84%.
Naduh ka por mynstep, ki nongthep vote kila iamih paidbah ban ienglain bad ban ioh iathep iala ki vote ha kane ka elekshon.
U Chief Electoral Officer (CEO) BDR Tiwari u pyntip ba ha ka elekshon MLA 2023, ka jingpoi ki nongthep vote ha kane ka constituency ka long 90%.
U iathuh ba ha kane ka kynti, 33088 ngut ki nongthep vote ba kynthup ia 16207 ngut ki kynthei bad 16881 ngut ki shynrang kila pyndep ia ka jingthep vote, kaba la sdang naduh ka por 7 baje mynstep haduh 6 baje janmiet ha baroh ki 51 tylli ki Polling Station.
U pyntip ba ka Sanjengpara polling station ka dei kaba bun tam ki nongwan thep vote kaba la kot sha ka 95.60%.
U CEO ula pyntip ba ha ka mock poll ba long mynstep, la bujli ia kawei ka VVPAT bad hadien bala sdang pat ka jingiathep vote ki paidbah 3 tylli ki BU, 3 tylli ki CU bad 6 tylli ki VVPAT la hap ban bujli ha ki 5 tylli ki Polling Station.
Ki don haduh 6 ngut ki kyrtong ba iakhun ha kane ka elekshon shiteng samoi ba kynthup ia ka kurim u Myntri Rangbah Conrad K Sangma, ka Dr Mehtab Chandee A Sangma kum ka kyrtong ka NPP, u Jingjang M Marak jong ka Congresss, ka Sadhiarani Sangma jong ka AITC bad u Bernard N Marak jong ka BJP.
Arngut ki dei ki kyrtong shimet ba kynthup ia u Sengkrabirth M Marak bad Jerry A Sangma.
Ia kane ka elekshon la pynlong namar ka jingiehnohkam u Nongialam ka Congress Saleng A Sangma hadienba ula shah jied kum u MP ka Tura.
Ha kajuh ka por, ki bor ka Ain kila ioh ban kurup ia ki mar ki mata kiba shongdor haduh T.12.72 lak tad haduh ka sngi thep vote bad na kane, 179621 ka dei ka pisa, 2.099 lak ka kyiad, 2.40 lak u droks bad ki jingai sngewbha ba 5.4248.
