Gambegre By-Election | Dang kham beh ka lyer sha ka kyrtong ka NPP, ong u DyCM

Shillong, Risaw 25 : U National General Secretary ka National Peoples’ Party (NPP) bad Symbud Myntri Rangbah Bah Sniawbhalang Dhar ha ka sngi Thohdieng, ula ong ba ki khubor ba u ioh na Gambegre ki pynpaw ba ka lyer ka dang kham beh sha ka kyrtong ka NPP haba nujor bad kiwei pat ki kyrtong.

“Kat haduh mynta ka sngi, ka khubor ka long kaba sngewtynnad bha. Ka kyrtong jong ngi ka dang ialam nakhmat haba nujor bad kiwei ki kyrtong ban aireng ha ka elekshon” ong u Bah Sniawbha haba iakren bad ki nongthoh khubor.

Haba kyrpad ia ki paidbah ka Gambehre ban vote sha ka kyrtong ka NPP ka Dr Mehtab Chandee A Sangma, kaba dei ka kurim u Myntri Rangbah ka Jylla Conrad K Sangma, u Bah Sniawbha ula ong ba ka NPP ka phaikhmat eh ha ka ban wanrah ia ka roi ka par hapoh ka constituency.

Ka Dr Mehtab kan iakhun pyrshah ia 5 ngut ki kyrtong – Sadhiarani M Sangma jong ka TMC bad kurim u MLA barim ka Rangsakona Zenith Sangma, Jingjang M Marak jong ka Congress bad u nongbud ba jan bha jong u MLA barim bad MP ka Lok Sabha Saleng A Sangma, u Vice President ka BJP bad MDC ka Tura Bernard N Marak bad arngut ki kyrtong shimet- Sengkrabirth Marak bad Jerry A Sangma ha kane ka elekshon ka ban thep vote ha ka 13 tarik Naiwieng.

U Bah Sniawbha ula ong ba ka jingmih u kyrtong ka BJP kan ym ktah satia ia ka NPP. “Phi iohi, man ki party ki don ia ka hok ban sei kyrtong. Ym don jingthut. Ka BJP kan iakhun la ka jong, ka Congress la ka jong, ka TMC la ka jong bad ka NPP ruh kan iakhun la ka jong”.

Nalor kane, une u Nongialam ka NPP ula ong ba ka TMC ruh kam dei satia ka jingma ia ka party bad bynrap “Nga tharai ka kyrtong ka TMC ka dang wan shadien jong ka kyrtong jong ngi kat kum ka khubor ba ngi ioh”.

Halor ka jingkynnoh ka TMC ba ka NPP kala pynkhein ia ka Model Code of Conduct (MCC), u Bah Sniawbha ula ong ba ai ba ka Election Commission kan khmih ia kane ka kam bad kan leh ia kaba donkam.