Shillong, Jymmang 13 : Watla ia ka elekshon MLA ha Sohiong la jop da ka United Democratic Party (UDP) hynrei dang don pat sa uwei u nongjop ba leh kham bha ban ia ki lai tylli ki seng sain pyrthei ba paw ha ka Jylla.
Une u Nongjop u dei u NOTA (Non of the Above). U NOTA ula ioh haduh 272 vote n aka 32,161 vote bala iathep ha kane ka elekshon ha Sohiong.
Kaba sngew thamula ka long ba lai tylli ki seng sain pyrthei ba paw ha Jylla- ka Hills State People’s Democratic Party (HSPDP), Bharatiya Janata Party (BJP) bad ka All India Trinamool Congress (AITC)-kila ioh duna vote haba ianujor bad ka NOTA.
Baroh la tylli ki party ne ki kyrtong jong kine ki party kim shym la kynjoh ia ka 100 vote. Ka HSPDP kala ioh tang 62 vote, ka BJP kala ioh tang 40 vote bad ka AITC kala ioh tang 89 vote.
Ha kawei pat ka liang, u Kyrtong ka UDP Bah Synshar Kupar Roy Lyngdoh Thabah ula ioh 16679 vote n aka 32161 vote. Ula jop ia kane ka elekshon da 3422 vote pyrshah ia uba wan ba-ar uba dei u kyrtong ka NPP bad MLA barim Bah Samlin Malngiang, uba ioh 13257 vote.
U kyrtong uba wan balai u dei jong ka Congress Bah S Osborne Kharjana uba ioh 1762 vote.
