Shillong, K’lyngkot 31 : I MLA ka East Shillong Constituency Kong Ampareen Lyngdoh lem bad ka Para Dr Jasmine Lyngdoh, kila thep kyrteng hynne ka sngi ba-ar hakhmat u Returning Officer, ban long ki kyrtong sha ka elekshon MLA-2023 ka ban long ha ka 27 tarik Rymphang.
Kine baroh arngut ki shipara kila thep kyrteng kum ki kyrtong ka National People’s Party (NPP). I Kong Ampareen iban iakhun na East Shillong constituency, i dei iba nyngkong eh na ki kyrtong ban thep kyrteng bud sa I Para Dr Jasmine I ban mih iakhun na Nongthymmai constituency ha ka sien ba nyngkong eh.
Haba iakren bad ki nongthoh khubor, I Kong Ampareen ila ong “ Ka ju dei ka rukom leh ha ka Iing jong ngi naduh ka por I Pa (L) Peter G Marbaniang bad u Hynmen jong nga (L) Bah RG Lyngdoh ban thep kyrteng beit ha ka kynta ba nyngkong bad ka sngi ba nyngkong bad khnang ban pynneh ia kane ka rukom leh, ngi la wan ban thep kyrteng mynta ka sngi”.
“Nga la jop la 4 tylli ki elekshon bad nga la shakri ia ki briew jong nga, nga ngeit skhem ba ka jingkyrshan ia nga kan nang khlain bad nang ioh na ki briew. Ka nongrim jong nga kum ka nongthaw ain ka long ban pynthikna ban pyniadon bynta lang ia ki paidbah ha baroh ki rai bala shim, sngap ia kaei kaba ki ong, shna ia ki policy, pynkhreh ia ki prokram, bad ban peit ia kaei kaba ki paidbah ki donkam haba nga leit rung sha ki iing jong ki” ila bynrap.
Kumjuh ruh u MLA barim ka Mylliem Bah Pynshai Manik Syiem, ula thep kyrteng kum u kyrtong shimet ban mih aireng pyrshah ia u MLA Bah Hamletson Dohling bad MDC Bah Ronnie V Lyngdoh na Mylliem constituency.
