Shillong, K’lyngkot 18 : Ka Election Commission on India (ECI) kala pynbna ba ka jingiathep vote sha ka elekshon MLA-2023 ha Jylla Meghalaya kan long ha ka 27 tarik u Rymphang bad ka jingniew ia ki vote kan long ha ka 2 tarik u Lber 2023.
Kane ka long kat kum ka jingpynbna jong ka Election Commission of India ia ki tarik jong ki elekshon MLA ha ki lai tylli ki Jylla ka thain Shatei Lam Mihngi ba kynthup iaka Meghalaya, ka Nagaland bad ka Tripura.
U Rajiv Kumar, Chief Election Commissioner (CEC) , u pyntip ba ka Meghalaya bad ka Nagaland kin pynlong ha kajuh ka sngi ia ka jingiathep vote kata ha ka 27 tarik Rymphang katba ha Tripura kan long ha ka 16 tarik u Rymphang.
Kine baroh 3 tylli ki Jylla ki don mar 60 tylli ki Constituency. Ka sngi ban niew ia ki vote ha baroh lai tylli ki Jylla kan long ha ka 2 tarik u Lber, 2023.
Ha Meghalaya bad Nagaland, ka sngi ban pynmih ia ka jingpynbna (Notification) bad sdang thep kyrteng ki kyrtong kan long ha ka 31 tarik Kyllalyngkot bad ka sngi khatduh ban thep kyrteng kan long ha ka 7 tarik u Rymphang.
Ka sngi bishar ia ki kyrteng jong ki kyrtong kan long ha ka 8 tarik u Rymphang bad ka sngi ba khatduh ia ki kyrtong ban weng noh ia ki kyrteng kan long ha ka 10 tarik u Rymphang.
Katba ha Jylla Tripura, ka sngi pynmih ia ka jingpynbna bad ban sdang thep kyrteng ki kyrtong kan long ha ka 21 tarik u Kyllalyngkot bad ka sngi thep kyrteng ba khatduh kan long ha ka 30 tarik Kyllalyngkot.
Ka sngi bishar ia ki kyrteng jong ki kyrtong kan long ha ka 31 taik Kyllalyngkot bad ka sngi ba khatduh ia ki kyrtong ban weng noh ia ki kyrteng kan long ha ka 2 tarik u Rymphang.
Ka ECI ka pynbna ba ka sngi thep vote ha Tripura kan long ha ka 16 tarik Rymphang bad ka jingniew ia ki vote kan long ha ka 2 tarik u Lber.
U CEC ula pynbna b aka Model Code of Conduct (MCC) kala sdang treikam mynta.
