Shillong, Rymphang 03: U kyrtong ka Congress na Mawlai u bah Marbud Dkhar hynne ka sngi ula kam ba ka jingiakhun ha Mawlai kadei hapdeng ki High Level Party pyrshah iaki Low Level Party.
Haba kren hadien ka jingthep kyrteng u bah Marbud Dkhar ula ong ba u sngew donbok ba u ioh iakhun ia kane ka ilekshon lyngba ka ticket jong ka Congress namar kadei ka Party kaba ieng naka bynta ka bha ka miat ki paidbah.
U bah Marbuh ula ong ba baroh ki tip ba ka Mawlai kadei ka constituency jong ka Congress bad mynta ka kynti ruh ka Party kan jop biang ha Mawlai namar ki paidbah ki sngewthuh ba dei tang ka Congress kaba ieng naka bynta ka bha ka miat ki paidbah khamtam ki rit ki ria bad ki duk ki suk jong ka jylla bad ka ri India baroh kawei.
“Ka jingiakhun ha Mawlai kadei hapeng ki High Level Party pyrshah iaki Low Level Party bad ki paidbah ka constituency kin sa ai ka bishar kaba biang namar ki la thait bad kila ngiah ban shah synshar ha ka sorkar High Level” la ong u bah Marbud.
U bah Marbud ula ong ruh ba u ai ka jingkhublei iaka Election Commission of India (ECI) kaba la bthah ia baroh ki Party ban pynbna iaki kyrtong kiba don mokutduma namar kane kan pynshai paidbah, mano ba khuid bad mano ba don dak sniew napeng ki ban iakhun ha ka elekshon.
U bah Marbud ula kyntu iaki paidbah ka thain Mawlai ba kidei ban kynmaw iaki jingleh ka sorkar MDA ha ki 5 snem bala dep kaba la wanrah ka jingjynjar ym tang iaka thain hynrei iaka jylla baroh kawei.
Shuh shuh ula bynrap ba ki mat ba hakhmat eh ba u ieng ban iakhun elekshon ha kane ka kynti kadei ban weng noh iaka jaka theh jaboh kaba don ha Marten, ban weng iaka ktem CRPF na Mawlai bad kumjuh ban pynioh ka bishar kaba hok naka bynta u nongialam barim ka HNLC bah Cheristerfield Thangkhiew (Bam Kwai Dwar U Blei).
