Shillong, Rymphang 06 : U Ophisar IPS bala shongthait bad kyrtong ka BJP na North Shillong Bah Mariahom Kharkrang, hynne ka sngi nyngkong, ula thep kyrteng kum u kyrtong ban iakhun ia ka elekshon MLA-2023 bad pynpaw ia ka jingsngewskhem ba ka North Shillong kala dei lypa ka constituency jong ka BJP.
Ia une u Ophisar Pulit IPS barim la synran da I Kurim, ki Khun bad ki Nongkyrshan.
“Ngi sngew skhem, ka North Shillong kan dei ka constituency ka BJP bad ngam don jingartatien ia kata. Ha ka elekshon bala dep, ngi la rem tang kumba 300 vote, mynta ka kynti ngin ioh beit ia ka jingjop da kaba don burom” ong u Bah Kharkrang haba iakren bad ki nongthoh khubor.
U Bah Micheal Kharsyntiew uba la shah pynduh ia ka ticket ka Party, ula rai ban iakhun noh kum u kyrtong shimet.
Haba kylli la ka party kala pait la pra ha ka constituency, u Bah Kharkrang ula ong ba ka BJP kam dei satia ka iing ba iapait iapra bad um iohi satia ia u Bah Micheal kum ka jingma ha kane ka elekshon ban wan.
“Ka vote jong ka BJP kam pra satia. Kino kino kiba dei ki Nongtrei ka BJP kin dei beit ki nongtrei ka BJP” ula ong.
Ula ong ba ia ka ticket ka party la ai sha u halor ka nongrim ba u kham biang bad ong “Phin hap ban kylli ia kito ki briew kiba shah thied namar ngam shym la pynlut wat tang shi naia ruh. Nga la ioh ia kane ka ticket kat kum ka kaiphod survey bad kiwei kiwei ki nongrim ba ka party kala shim bad ngam shym la pynlut shi naia ruh ban ioh ia kane ka ticket”.
U Bah Kharkrang ula pynpaw ruh ia ka jingsngewskhem ba ki paidbah ka constituency kin vote ia ka BJP.
“Ka North Shillong ka dei ka constituency kaba nga hap ban ong ba 100% ki briew ki dei kiba la nang la stad, ki nongshongshnong ki ioh lut ia kiei kiei baroh, kin sa peit ia ka jingtreikam jong ka party ha kiwei ki Jylla bad khlem pep ia ka jinglah treikam jong u kyrtong bad halor kine ki nongrim, kin sa shim ia ka rai bad nga thikna skhem ba kiba bun ki jied ia ka BJP” ula ong.
Hynrei ula kyntait pat ban kynthoh ia ka jinglah treikam jong u MLA ka constituency Bah Adelbert Nongrum bad ong “Ngam tharai ba ka iahap ia nga ban ai jingkynthoh. Ia kane hi nga ieh ha ki nongthep vote”.
Halor ki jingkynnoh ba u ju donkti ha ka jingsiat iap klep ia ki briew ha ka por ba u dang long Pulit, u Bah Kharkrang ula ong “Mano mano uh ki lah ban pynmih ia ki jingkynnoh. Ka kti jong ka ain ka don, ka Iingkashari ka don bad mano mano ba pynmih ia kane ka jingkynnoh, nga tharai nga hap ban ong ba ka dei tang ka jingkwah pynthohbria”.
Haba kren ia ki kam ba u buh hakhmat eh ban leh na ka bynta ka constituency, u Bah Kharkrang ula ong u la pynleit jingmut halor ki saw tylli ki mat- ka pule dangle, ka koit ka khiah, ka iohkam iohjam bad ka jingshongshngain.
Ula ong, lada kam don hi ka jingshongshnhain, ka Jylla kan ym kiew satia ha ka roi ka par.
