Kot 88 ngut kiba thep tang hynne ka sngi
Shillong, Rymphang 04: Haduh 88 ngut ki kyrtong na kylleng ki constituency jong ka jylla Meghalaya hynne ka sngi kila leit ban thep kyrteng ban iakhun iaka MLA Election 2023 bad baroh ki kyrtong kiba la poi thep kyrteng ha kine ki 5 sngi kila don 163 ngut.
Naduh ka 31 tarik u Kyllalyngkot haduh ka 4 tarik u Rymphang kiba la thep kyrteng baroh ban iakhun iaka elekshon kila don 163 ngut bad tang hynne ka sngi Saitjain kila don 88 ngut kiba la leit thep kyrteng.
Na kine ki 163 ngut ki kyrtong kila don 17 ngut ki Longkmie kiba la pyndep iaka jingthep kyrteng ban iakhun iaka elekshon bad 21 ngut kila thep kyrteng ban iakhun kum ki kyrtong khlem seng ne Independent.
Ha ka sngi sdang jong ka jingthep kyrteng, ka Myntri sorkar barim ka jylla ka Kong Ampareen Lyngdoh (NPP) East Shillong bad ka para ka jong ka, ka Kong Jasmine Lyngdoh (NPP) Nongthymmai kidei kiba nyngkong eh ban leit thep kyrteng ban iakhun iaka elekshon MLA 2023 bad ha kane kajuh hi ka sngi, u MLA barim ka Mylliem Constituency u Bah Pynshai Manik Syiem ula thep kyrteng ban iakhun kum u kyrtong khlem seng na ka Mylliem Constituency.
Ha ka sngi Nyngkong jong ka jingthep kyrteng kila don tang 3 ngut kiba thep kyrteng, ha ka sngi Baar kiba thep kyrteng ki don 4 ngut, haka sngi Balai ki don 17 ngut kiba thep kyrteng, ha ka sngi kaba Saw ki don 57 ngut bad ha ka sngi kaba San kiba la thep kyrteng ki don 88 ngut.
Kine kiba la thep kyrteng ki kynthup kum ki kyrtong na ka seng NPP, AITC, UDP, Congress, HSPDP, VPP, PDF,GNC, BJP, JDU bad ki kyrtong shimet.
Kila don ruh 2 tylli ki Constituency ha ka jylla kiba kynthup ia ka Jowai bad Amlarem kaba haduh mynta ym pat shim la don kino kino ki kyrtong kiban leit thep kyrteng ban iakhun iaka elekshon na kitei ki Constituency.
Kane ka jingthep kyrteng ki kyrtong kala sdang ha ka 31 tarik u Kyllalyngkot bad kan kut ha ka 7 tarik u Rymphang 2023 bad ka jingthep vote kan long haka 27 tarik u Rymphang bad ka jingniew Vote kan long haka 2 tarik u Lber 2023.
