Nongpoh, Naiwieng 19: U Chief Adviser ka NPP-Ri-Bhoi District uba dei ruh u MLA barim ka Umroi Bah Ngaitlang Lyngdoh, ula pynpaw ia ka jingsngew skhem ba ka NPP kan ioh khur ia ka jingjop na baroh 5 tylli ki Legislative Assembly Constituency ka Ri-Bhoi District ha ka elekshon MLA-2023.
Une u Nongialam ka NPP bad Kpa jong u MLA ka Mawhati bad Myntri Sorkar Bah Dasakhiat Lamare, ula pynpaw ia kane haba kren ha ka jingialang jong ki Nongialam ka NPP ka Mawhati Block, kaba long hynne ka sngi saitjain ha Mawhati.
U Bah Ngaitlang haba kren ha ka jingialang, ula pynskhem syndon ia u Bah Shemphang Lyngdoh kum u kyrtong ka NPP na Mawhati bad ruh kum u President ba thymmai ka Mawhati Block.
“Nga dap da ka jingsngew kmen ban iohi ia ka jingieid jong ki paidbah ia ka seng NPP ha Ri-Bhoi District bad ula ong ruh ba ha u 2023, la thikna ba ka NPP kan synshar ha Ri-Bhoi District baroh kawei” ong u bah Ngaitlang.
Kane ka jingialang kala pynkyndit ia ki Nongialam ba hakhmat jong ka NPP haba sakhi ia ki hajar ngut ki nongkitkam jong ki Unit bapher bapher kila wan ban iashimbynta lang, ban pynheh mynsiem ia ki nongialam khamtam ia u kyrtong u ban iakhun na Mawhati ha ka elekshon 2023.
Ka NPP-Mawhati Block ha kane ka sngi kala pdiang burom ruh ia ki Nongialam ba hakhmat jong kiwei pat ki party kiba la wan pyniasoh ialade sha ka NPP.
Kiba la iadonlang ha kane ka sngi ki kynthup ia u Bah Dasakhiat Lamare, u Bah Shemphang Lyngdoh uba la paw kyrteng ban long u kyrtong ka NPP ha ka elekshon MLA-2023 na Mawhati, u President ka Synjuk ki Rangbah Shnong ka Ri-Bhoi District, u MDC barim ka Mawhati Bah James Sylliang bad ki riew pawkhmat ka thain Mawhati.
U Bah Dasakhiat haba ai jingkren ula ong ba kum u MLA ula leh shibun ki kam hapoh ka Constituency bad ki kam ba ula trei kila paw bad kila iaid shakhmar hynrei ia kaba dang sah, yn sa shimti ban pyndep da u Bah Shemphang Lyngdoh uba don ka jingthrang ban kyntiew ia ka Mawhati Constituency.
Lah ban kdew hangne ba u Bah Dasakhiat ula pynbna ba ym iakhun shuh ia ka elekshon MLA 2023 na Mawhati hynrei un leit lur ia ka lyngkha thymmai ha Nongkren Constituency.
“Ka Mawhati kan dei ka constituency kaba donbok bha ha u snem 2023 namar kan sa ioh 2 ngut ki MLA. Wat lada ngam iakhun shuh na Mawhati ruh hynrei ka mynsiem kan sah ha Mawhati” ula ong haba ai ruh ka jingkitbok kit rwiang ia u kyrtong u ban shim iaka jaka jong u .
Na ka liang u Bah Shemphang Lyngdoh kum u kyrtong ka NPP na Mawhati, u la ong ba u donkam ka jingïatreilang bad ki paidbah ban kham pynbha ïa ka roi ka par bad ki jingkylla ha kane ka thaiñ bad u la pynpaw ruh ïa ka jingsngewnguh ïa u MLA u ba la lah ban trei na ka bynta ka bha ka miat na ka bynta u paidbah kum ba u la kular.
