Shillong, Rymphang 02 : U National Vice President ka National People’s Party (NPP) bad Symbud Myntri Rangbah Bah Prestone Tynsong, hynne ka sngi palei, ula pynpaw ia ka jingsngew skhem ba ka party (NPP) kan tam ia mar shiteng ka jingdon ki MLA ha Jylla bad ban thaw ia ka Sorkar ba thymmai.
“Mynta ka kynti ngin sa tam ia ka 34 seat bad palat” ong u Bah Prestone haba iakren bad ki nongthoh khubor.
Haba kam ba ka NPP kala ioh bha ia ka jingshaniah na ki nongthep vote ha kylleng ka Jylla, ula ong “Ym pat ju jia ha ka jingiaid lynti jong nga ha ka kam sain pyrthei ban iohi ia kum kane ka jingkylla.Balei?. Namar ki jingkynnoh pyrshah ia ngi kila palat liam bad khatduh, ki nongthep vote ka Jylla haba ki bishar dalade, ki shem ba ka Sorkar ba ialam ka NPP kala trei bha ban ia kiwei ki sorkar ba ialam da kiwei ki party”.
Haba kylli halor ka rai ka BJP ban nym mih satia na ka sorkar MDA ba ialam ka NPP, u Symbud Myntri Rangbah ula ong ba ka dei namar ka jingkynnoh jong ki pyrshah ia ka party kam ieng nongrim satia bad ba ki nongthep vote kila sngewthuh kumno ban jubab ia ki ha ka 2 tarik u Lber.
“Nga la lyngngoh bad kyndit (ban iohi ba kila rai ban neh) namar katto katne na ki nongialam ka Jylla kila byrngem ban mih noh na ka Sorkar MDA ba ialam da ka NPP nalor ki jingkynnoh ba bun jong ki ba pynlong wat ia nga ban pynpaw shai ba lada ki sngew dei ba kin mih, balei ba kim mih hynrei kala dier palat ka por (iaki) ba kin mih” ula ong.
Ula buh jingkylli balei ka BJP kam shym la pynmih ia kano kano ka jingkynnoh ha kine ki saw snem shiteng. “Balei mynta ba sah satang 3-4 bnai shuwa ka elekshon phi sei ia ki jingkynnoh ba khlem nongrim. Khadduh hi, ngam sngew pher ba ha kawei ka liang ki ong ba kane ka Sorkar ba ialam ka NPP ka dei kaba sniew bha katba ha kawei ka liang ki ong ba ki kyrshan ia ka Sorkar ba ialam ka NPP. Ai ba ki paidbah kin rai” bynrap u Bah Prestone.
Une u Nongialam ka NPP ula thalain tyngeh ruh ia ki Nongialam ka Congress ba kynnoh ba ka Sorkar MDA kala iada ia ki riew bamsap bad ong “Ka dei ka jingkynnoh ba khlem nongrim. Balei ba ki leh kumta?. Ka dei tang namar ba kin ioh vote bad ban pynkulmar jingmut ia ki paid nongthep vote ka Jylla…hynrei nga ong ha phi da kaba shai kdar ba mynta ka kynti, ngin sa tam ia ka 34 seat bad palat”.
Haba pynshai shuh shuh, ula ong “Ngan iathuh ha phi kawei, haba ngi pyniaid ia ka sorkar, ka sorkar ka don tad haduh mynta, ka synshar khadar ka don bad ngi dang pyniaid ia ka sorkar bad ngi don ia ki bor ban khmih iakawei pa kawei ka tnad. Hangno ba mih ki jingkynnoh la ki dei kiba shisha ne kiba lait, kumno ba ngin wad ia kine, ngi la don lypa ki bor treikam bad ngi la don ruh ia u Chief Vigilance Officer bala khlieh da u Chief Secretary. Mano manor uh ki lah ban iakren bad u ha kano kano ka por ne khylliew bad un sa leh ia kaba donkam”.
