Shillong, Kyllalyngkot 31: U Kyrtong shimet na Mylliem Constituency u Bah Pynshai Manik Syiem uba la mihkhmat 3 sien iaka Mylliem hynne ka sngi, ula pynpaw iaka jingskhem jingmut ba ki paidbah kin pynjop biang ia u ha ka Elekshon MLA da ka jingbishar bniah ia ki kam kiba ula leh ha ki snem kiba la leit.
“Na ka bynta ka constituency ngi kwah ban wanrah iaka roi ka par kaban long katkum kane ka juk kaba mynta (21st Century) bad naka bynta ka jylla, ngi donkam ban pynbha, pynthymmai iaki aiñ kiba la rim ba la jah khnang ba kin kham bun ki bniat kiba lah ban iada iaka lawei jong ka jaidbynriew” ong u Bah Pynshai.
“Nga skhem jingmut100 na ka 100 ba ngan jop iaka elekshon namar ki kam kiba nga la trei ha ki por kiba la leit.Kaei kaba nga lah leh ha ki 15 snem mynshwa kum u MLA kadei kaei kaei ka ban pynlong ia ki paidbah ba kin jied biang ia nga” ong u Bah Pynshai.
U Bah Syiem ula ong ba u la shim ia ka rai ban pan iaka jingkyrshan na ki paidbah ban sdang thymmai bad ban tei thymmai iaka constituency bad ka jingtyrwa kaba u don ia ki paidbah kadei tang ka roi ka par.
Ula ong, ka rai ka jongu ban iakhun kum u kyrtong shimet kadei namar ba u kwah ban ioh iaka jinglaitluid ha kaban kren bad yn ym don mano mano ruh kiba lah ban khang ne ban phah sngap jar ia kano kano ka ishu, kumta kum u kyrtong khlem seng yn lah ban kren ia kano kano ka mat kaba ktah iaka jaidbynriew.
“Ha ka por ba nga long MLA, ka jingioh ia ka skhim ka long tang da ki lak tyngka hynrei lada ki ai ia nga da ka klur tyngka nga lah ban lehshibun kiei kiei na ka bynta ka Mylliem Constituency” ong u Bah Pynshai bad ka bynrap ba um hun satia iaka jingwan ki kam pynroi ha Mylliem namar ki wan tang shisien haka san snem ne shwa ka elekshon bad kam wan baroh 4 snem.
“Nga nga rem ha u Kpa, lehse u Hamlet yn sa rem ha u khun” ong u Bah PM Syiem ha kaba ula batai shai ba ula rem iaka elekshon MLA ha ka por ba u ieng na ka seng NCP hapoh ka jingialam u Purno A Sangma bad mynta ruh kan jia biang kumjuh ia u Bah Hamlet uba u ieng na ka seng NPP kaba ialam da u Conrad K Sangma uba long u khun jong u Purno A Sangma.
