Shillong, Nohprah 06 : U President ka United Democratic Party (UDP) Bah Metbah Lyngdoh hynne ka sngi ba-ar ula kyntait ba u don ka jingthmu ban mih aireng na artylli ki Constituency ha ka elekshon MLA-2023 ha Jylla.
“Ngan iakhun beit tang na kawei ka Constituency. Balei ba ngan iakhun na artylli ki Constituency” buh jingkylli u Bah Metbah haba jubab ia ka jingkylli halor kane ka kam.
Une u MLA ba lai samoi ka Mairang ula ong ba ka jingong ba un mih aireng na artylli ki Constituency ka dei kaba la shu thaw da mano mano hynrei ka dei ka bym don satia ia ka jingshisha.
U Bah Metbah ula kren ia kane halor ka jingmih khubor ba kynnoh ba u lah ban mih aireng ruh na Mawphlang Constituency, kaba mih khmat da u Bah Eugeneson Lyngdoh uba la pynbna dang shen ia ka rai ban nym mih aireng ha ka elekshon 2023.
Une u Nongialam ka UDP ula iathuh ba ka UDP kala dep don lypa ia u kyrtong na Mawphlang Constituency.
Haba kylli halor ki jingkynnoh da u Chief adviser ka Party Bah Bindo M Lanong ba u shah pynduh ticket na Nongkrem Constituency, u Bah Metbah ula ong “Ngim shym la kyntait iano iano ruh. Ngi burom ia baroh hynrei haba kut ka sngi, baroh kin hap ban iatrei na ka bynta ka party”.
Hynrei ula kyntait pat ban kynthoh halor ka jingbyrngem u Bah Bindo ban pynkha ia ka seng sain pyrthei ba thymmai bad ong “ Kaei kaba la thoh ha ki kot khubor ngan ym pat lah ban ong eiei. Ngam don eiei ban kynthoh”.
“Ngi la iatrei kum ka party bad kum ka kynhun. Ka jingpynbna ia ki 32 ngut ki kyrtong, kane hi ka kren ba ka party ka long kaba iatylli. Ngi don ki jingiapher jingmut hynrei ngi iapynbeit hi hapoh ka party. Kane ka dei ka kam pohiing. Baroh ki don ia ka hok ban pynpaw ia kano kano ka jingsngew hapoh ka party” ula ong.
