Shillong, K’lyngkot 20 : U Chief Adviser ka UDP bad Symbud Myntri Rangbah barim ka Jylla Bah Bindo M Lanong, hynne ka sngi thohdieng, ula khein antad ba ka party (UDP) kan ym jop wat tang 10 seat ha ka elekshon MLA-2023 ha Jylla, ka ban long ha ka 27 tarik Rymphang.
“Ngam tharai ba kan (UDP) ioh wat tang 10 seat. Nga lah ban khein antad ym palat ka 10” ong u Bah Bindo uba dei u MDC ba shusieh jong ka KHADC haba iakren bad ki nongthoh khubor.
Ula khein ruh ia ki jingkam jong ki Nongialam ka UDP ban tam mar shiteng ha ka jingdon ki MLA ha Jylla kum ka “ urlong tang ha ka jingphohsniew”.
“Jin ba nga iadon lang bad ki, ngi lah ban tam ia 15-16 seat hynrei 30 seat nga sngew ba ka dei tang ka jingphohsniew” ong u Bah Bindo.
Une u Nongialam bad Nongseng ka UDP ula rai ban mih iakhun ia ka elekshon MLA-2023 kum u kyrtong shimet n aka UDP-O hadien ba ka UDP kala rai ban ai ticket ia u MLA ba mynta ka Nongkrem Bah Lambor Malngiang.
Nalor kane, ula ong ruh ba bun ki Nongialam ha ka UDP kim pat long kiba ibit ne lam ban ialam ia ka Jylla. “Kiba bun na ki, kim pat ibit ne lah ban ialam ia ka Jylla. Namar kata, ki business man ki dei ban pynleit jingmut ha ka business” bynta u bah Bindo.
Haba kylli, une u Nongaibuit ba hakhlieh duh ka UDP ula ong ba ki paidbah kin sa ai jingsneng kaba biang eh ia ki nongialam jong ka party.
“Kim (Nongialam) lah ban tehlakam iala ka jong ka Iing, kumno kin pyniaid ia ka Jylla. Lada kim lah ban leh eiei iala ka jong ka Iing-ka UDP, kumno kin lah ban leh eiei ia ka Jylla” ula buh jingkylli.
Haba pynrem ia ka party ba ka kham noh sha ki business man haba ai ia ka ticket iakhun elekshon, u Bah Bundo ula ong “Kila don bun ki businessman kiba la wan sha ka UDP. Na Umsning u dei u businessman, wat hangne ha Nongkrem Constituency bad ha kiwei kiwei ki jaka ruh. Phi kret ia u shipai uba long discipline. Nga dei une u shipai ba long discipline”.
“Ka kyrteng jong ka UDP haba ianujor bad ka por bala leit mynta lem bad ka mynta kan kren hi dalade. Kito kiba don khmat ai ba kin iohi..kito kiba don skhor ai ba kin sngap bad iohsngew. Ka UDP kam dei shuh ka party kum kaba nga khmih lynti. Ngam shym poi pyrkhat ba ka UDP kan long kumne mynta” ula pynpaw ia ka jingbabe.
