Shillong, Rymphang 22: Ka Bharatiya Janata Party (BJP) hynne ka sngi Saitjain, ka la pynpaw ia ka jingsngew skhem ba kan jop katto katne ki seat ha la elekshon KHADC bad JHADC, kaba thep vote hynnin ka 21 tarik Rymphang.
U General Secretary ka Meghalaya BJP Bah Wankitbok Poshna u la kam ba ka Party kan jop katto katne ki seat na Ri-bhoi, South West Khasi Hills bad Jaintia Hills ha kane ka elekshon sha ki Autonomous District Council (ADC).
Ia ka result jong ka ilekshon MDC sha ka KHADC bad JHADC yn pynbna ha ka 24 tarik Rymphang.
Haba iakren shaki pathai khubor, u Bah Wankitbok u la ong “Ngi don ka jingkyrmen halor kane ka elekshon bad ngi khmih lynti ba ngin ioh khyndiat ki seat ha Ri-bhoi, South West Khasi Hills bad Jaintia Hills”.
Haba kylli shaphang ka Party kaba ïatreilang bad ka NPP bad ka UDP, u bah Wankitbok u la ong ba ka jingïatreilang kan nym don kano kano ka jingktah ha ka elekshon namar ba ka BJP ka la ïakhun da kaba pynshong nongrim ïa ki mat treikam jong ka Party.
“Nga sngewskhem ba ki briew kin ai ia ka rai jong ki bad ngi kyrmen ba kin ioh iaka jingjop” u la ong.
