Nongstoiñ, K’lyngkot 29: Sa 2 ngut ki kyrtong kiba la pyndep ïa ka jingthep kyrteng napoh West Khasi Hills District mynta ka sngi ban iakhun ia ka elekshon sha ka Iingdorbar ka KHADC, ka ban long la 21 tarik Rymphang.
Kine ki ar ngut ki kyrtong ki dei u bah Kodang Rashir na ka Congress bad u bah Sranly Rongrin na ka UDP ki ban aireng na ka Mawshynut Constituency.
Ïa ki kyrtong la synranlang ruh da ki bahaiing hasem bad ki nongkyrshan.
U kyrtong ka Congress u bah Kodang Rashir haba ïakren sha ki lad pathai khubor, u la ong ba ka thong jong u ka long ban pynneh ïa ka Riti ka dustur jong ki khun Khasi Khara bad ïa ka khyndew ka shyiap.
U la ong ruh ba u jied ïa ka Congress namar ka dei ka National Party kaba lah ban shakri khambha ïa ki paidbah. U la ong ruh ba dei tang ka Seng Congress kum ka National Party kaba ai ka jingïada ïa ka hok jong ki paidbah la ka long ha ka niam bad ha ka bam ka dih.
U bah Sranly Rongrin kyrtong ka UDP u la ong ba ka jingmih madan jong u ka dei hadien ba u ïohi ïa ka jingeh ki paidbah nongshong shnong, khamtam ha ki thaiñ nongkyndong kynthup ka jingduna ka roi ka par.
