Shillong, Naiwieng 06 : U Nongialam ka UDP bad Myntri Sorkar bah Kyrmen Shylla ha ka sngi Balang ula ong ba ki paidbah ki dei ban thep vote haba pynshong nongrim ia ka roi ka par bad ki jingkular bala pynurlong ym ia ka ktien jali jaum ha kane ka elekshon ban wan sha ki artylli ki Autonomous District Council ha Ri-lum Khasi bad Jaintia ban long ha u snem ban wan.
“Nga kyntu ia ki paidbah ka Jylla ba ha kane ka kynti, kim dei shuh ban sngap ia ki kyntien jali jaum hynrei ban khmih ruh ia kaei ka roi ka par bad ki jingkular kiba la pynurlong (hashuwa ban thep vote ha ka elekshon MDC)” ong u Bah Kyrmen haba iakren bad ki nongthoh khubor.
U Bah Kyrmen ula ong “Ha ka jingshisha ka dei ka jingkyrkhu ba don ha ka Sorkar. Ngi ioh ia ka lad ban wanrah ia ka roi ka par sha u paidbah. Hynrei lada phi don shabar ka Sorkar, phin nym ioh ia ki kam pynroi ia ki constituency jong phi bad phin nym lah ban shakri hok ia ki paidbah namar ym don ba jied ia phi ban shong ha Liang Pyrshah”.
“Kipaidbah ki kwah ban iohi ia phi ha ka Liang Synshar bad kane ka dei ka jingkhmih lynti jong ki. Ym don satia ki nongthep vote kiba khmih lynti ia ki MLA/MDC ban shong ha ka Liang Pyrshah” ula bynrap.
U Bah Kyrmen ula pyntip ba ka UDP kala pynkhreh shaid shaid ia ka elekshon MDC. Ula iathuh ba ka party kala ailad laitluid ia ki nongialam jong ka Constituency jong u, ba kin jied ia u kyrtong napoh ka constituency jong u.
Kat kum ka jingong jong u, baroh ki MDC ba mynta kin dei ki kyrtong jong ka party ha kane ka elekshon MDC ban wan.
” ong u Bah Kyrmen haba iakren bad ki nongthoh khubor.){kind=link}