Elekshon MDC| Ka HSPDP kan wanrah jingpynkylla ia ka Khasi Lineage Act

Shillong, K’Lyngkot 28: U kyrtong ka Hills State People’s Democratic Party (HSPDP) na Mawsynram constituency Bah Starfing Pdahkasiej hynne ka sngi Ba-ar, u la pynthikna ba ka HSPDP kan wanrah ia ka jingpynkylla kaba donkam ha ka Khasi Hills Autonomous District (Social Custom of Lineage) (Amendment) Act 2023 lada ka wan haka bor.
Kane jingpynkylla iaka Khasi Hills Autonomous District (Social Custom of Lineage) (Amendment) Act, 2023 ka dei ban pynthikna ba kan nym don ka jingshah pynbor iaki kur jong ki riewlum.
U Bah Starfing u la ong baka Party kan pynthikna ruh ba 28 tylli ki Hima ha kaba 6 tylli ki don ha Mawsynram kin don la ki jong ki jong ki Aiñ.
Haba kren sha ki lad pathai khubor hadien ka jingthep kyrteng ha ophis ka DC East Khasi Hills u Bah Starfing Pdahkasiej uba dei u nongthoh khubor ba rangbah bad u Editor jong ka SP News Agency u la ong ba kane ka dei ka sien kaba nyngkong ba u iakhun ia ka ilekshon MDC hadien ba u khlem jop ia ki ilekshon MLA kaba u la iakhun bunsien.
Haba pynpaw ba ka ilekshon MDC ka long kaba donkam bha, u Bah Starfing u la ong “Namar ba ka KHADC ka ïadei bad ki riti ki dustur bad ka bynta jong ka, ka long ban pynneh pynsah, kyntiew bad ïada ïa ki. Kumta nga la rai ban ïakhun ïa ka ilekshon ban pynthikna ba ki Hima kin don la ki jong ki jong ki Aiñ. Ki don 54 tylli ki Hima ha kaba tang 22 tylli ki la pynbeit ryntih ïa ki aiñ riti dustur jong ki bad mynta ki don la ki jong ki Aiñ, 4 tylli mynta ki dang ap ïa ka jingmynjur jong u Lat, bad 28 tylli ki dang hap ban don la ki jong ki Aiñ”.
“Hapoh ka Mawsynram constituency ki don 6 tylli ki Hima kiba dang hap ban don la ka jong ka Act bad kita ki long ka Nongshluit Sirdarship, Sinai Sirdarship, Synnei Sirdarship, Syiem Mawsynram bad Malai-Sohmat Syiem. Lada nga shah jied kum u MDC, nga pynthikna ban iatreilang bad baroh 6 tylli ki Hima ban pynthikna ba kin don la ki jong ki jong ki Ain namar khlem ki Ain kiba biang kan ktah shisha ia ka jingsynshar jong kine ki Hima. Kumta ka dei ka kamram jong ka KHADC bad kumjuh ruh ki MDC ba la jied ban ïarap ïa baroh ki 28 tylli ki Hima ba kin don la ki jong ki jong ki Aiñ,” u la bynrap.