Shillong Nohprah 09: Ka United Democratic Party (UDP) bad ka Hill State People’s Democratic Party (HSPDP) kiba don ha ka lama jongka Regional Democratic Alliance (RDA) kin iakynduh biang ha ka 11 tarik u Nohprah ban shim ia ka rai la kin ia iaid lang ryngkat ha ka jingiakhun ia ka elekshon MDC kaban wan jong ka KHADC bad JHADC.
Hadien bala wai ka jingialang jong ka RDA, u Working President ka UDP bad MDC ka Sohra Bah Titosstar Well Chyne ula ong, “Ngi lah rai ban iakynduh biang ha ka 11 tarik u Nohprah, ban shim ia ka rai kaba khatduh halor ki sienjam bad ka rai kumno ban iaid shakhmat ha kaba iadei bad ka elekshon MDC kaban wan, la ngin ia iaid lang kum ka kynhun ne ngin don ka jingia pyrkhat da kaba ia sngewthuh jingmut lang ha ka rukom pynieng ia ki kyrtong ha ki Constituency bapher bapher”.
“Ngin iakhun ha baroh 29 tylli ki Constituency. Ngin don ia ka jingiasngewthuh jingmut bad ki paralok ki jong ngi ka HSPDP ha ki katto katne ki constituency bad ia katei ka rai yn sa shim ha ka 11 tarik u Nohprah” ula bynrap.
U Bah Titos ula ong ba ka RDA ka don ia ka lad kaba biang bha na ka bynta ka elekshon MDC kaban wan bad ka UDP ryngkat bad ka HSPDP kin ialam ia ka Executive Committee ha ki District Council.
“Ngi don ia ka lad kaba biang bha, khamtam haba ka UDP ha ki district baroh kawei, ka HSPDP ha West Khasi Hills bad ha ki katto katne ki constituency jong ka East Khasi Hills.
Ngi don ha ka kyrdan kaba biang bha na ka bynta ka elekshon ban wan” ula ong.
Ula banjur ba ia ka elekshon MDC ym lah ban ianujor bad ka elekshon Lok Sabha bad ula ong, “Ka long kaba iapher bha. Phin sa iohi ia ka resol kaba pher ha ka elekshon MDC kaban wan”.
“Nga tharai phi tip khambha shaphang ka jinglong jingman jong ka jingshisha shaphang ka jinglah ka jong ngi haduh mynta. Ngi don ia ka jingshaniah kaba skhem bad nga ngeit skhem ba ka UDP bad ka HSPDP kin leh bha shuh shuh ha ka elekshon ban wan” la ong u Bah Titos bad ka bynrap, “Ha ka District Council, ngi (UDP) ngim don bynta lang ha katei ka sorkar, hynrei ngi don ha ka liang pyrshah. Kumta ngan iakhun ia kane ka elekshon kum ka Liang Pyrshah”.
U Nongialam ka UDP ula pynpaw ruh ba kan ym don satia kano kano ka seng saiñ pyrthei kaban ioh khur jingjop jong bun ngut ki kyrtong ban ioh ban ialam syndon ia ka EC ha ka elekshon MDC kaban wan.
“Phin iohi ia ka jingpher ha ka jinglong jingman namar ka elekshon MDC ka shong eh ha ki kyrtong hynrei ka seng ruh ka don ia ka bynta kaba khraw ban leh, hynrei phin sa iohi pat ia ka resol kaba pher ha kane ka elekshon” la ong u Nongialam ka UDP.
U Bah Titos Chyne ula kyntait ban kren ne pynpaw eiei, la ka jingmih ka VPP kan ktah ia ka seng UDP ne HSPDP bad ula ong, “Ngam kwah ban kren eiei halor kiwei pat ki seng saiñ pyrthei”.
“Ngi dang ia don ha ka lynti ban pynkhreh ia ka elekshon MDC kaban wan na ka bynta ka seng bad ka kynhun RDA” ula ong.
Katba ha kawei pat ka liang u President ka HSPDP u Bah KP Pangniang ula ong, ba ym don jingtip eiei ba ki ar ngut ki MLA ka seng ki don ia ka jingthmu ban pyniasoh noh ialade bad Kiwei pat ki seng saiñ pyrthei.
“Kam don kano kano ka jingbuh dak jingkylli ia ki (MLA) ba kin ym kyrshan ia ki kyrtong. Kidei shi bynta jong ka kynhun RDA” ula ong.
 bad ka Hill State People's Democratic Party (HSPDP) kiba don ha ka lama jongka Regional Democratic Alliance (RDA) kin iakynduh biang ha ka 11 tarik u Nohprah ban shim ia ka rai la kin ia iaid lang ryngkat ha ka jingiakhun ia ka elekshon MDC kaban wan jong ka KHADC bad JHADC.){kind=link}