Shillong, Iaiong 12: U State President ka National People’s Party (NPP) bad Symbud Myntri Rangbah Bah Prestone Tynsong, ula kyntu ia ki paid nongthep vote ba kin vote ia ka NPP, kaba la pynthikna ba ki jaka Sixth Schedule jong ka Jylla kin lait na ka jingtreilam jong ka Citizenship (Amendment) Act (CAA).
“Ngi kyrpad ia ki paidbah ba kin kyrshan ia ka kyrtong jong ngi namar ngi la lah ban pynthikna ba baroh ki jaka kiba hap hapoh ka Sixth Schedule kin lait na ka CAA” ong u Bah Prestone haba ialap elekshon ha ka shnong Ummulong kaba hap hapoh ka Nartiang Constituency, West Jaintia Hills.
Ula kyntu ruh ia ki paidbah ban kyntait ia ki jingkren ba long pyrshah ia ka NPP. “Ki paidbah kim lah ban kynnoh ia ka NPP haba phai sha ka roi ka par hynrei tang kawei ba ki ioh kynnoh ia ngi ka dei ba ka BJP bad NPP ki dei kijuh” ula ong.
U Bah Prestone ula pynkynmaw ba ha ka por ba wanrah ia ka Citizenship Amendment Bill (CAB) da ka BJP ha Parliament, baroh ki Seng sain pyrthei, ki Sengbhalang bad ki paidbah kila pyrshah ia ka.
“Ha u 2019, u dei u Conrad K Sangma kum u Myntri Rangbah, uba la khot ia ka jingialang jong baroh ki seng sain pyrthei na Meghalaya bad kiwei ki Jylla ka thain Shatei Lam Mihngi ha kaba la iarailang ba u Conrad un pan por ban iakynduh ia u Myntri Rangbah Duh ka Ri bad Myntri kam Pohiing ha Delhi. Kumta, ngi la iakynduh ia u PM bad u Myntri kam pohiing bad ngi la aiti ia ka dorkhas ba pyrshah ia ka CAB” ula ong.
“Hadien ba wan phai na Delhi, ngi la iakynduh biang ha Meghalaya bad ngi la rai ba u CM un pan por biang ban iakynduh ia u PM bad u Myntri kam Pohiing. Kumta, ngi la iakynduh biang ia u Myntri kam Pohiing hashuwa ka jingmynjur ia ka CAB ha Parliament. Ha katei ka por, u Myntri ka Sorkar Pdeng ula kular ia ngi ba ia ka CAB yn ym pyntreikam satia ha Meghalaya” ula bynrap.
U Bah Prestone ula kren shai ba ka MP ka NPP na Tura Agatha K Sangma kala kyrshan ia ka CAB ha Parliament halor ka nongrim ba ka Sorkar India kala mynjur ban pyllait noh ia ka Meghalaya, kaba don ia lai tylli ki Autonomous District Council (ADC).
“Sngewsih, ba ki paidbah kila pynrem ia ka (Agatha) bad ong ba ka BJP ka dei ka NPP bad ka NPP ka dei ka BJP hynrei nga ong ha phi ba kane kam dei kaba shisha tangba ngi dei kiba iadonlang ha ka Sorkar NDA ha Delhi” ula ong.
