Shillong, K’Lyngkot 09: U nongialam ka AICC uba khmih iaka Meghalaya bad u MP ka Jylla Tamil Nadu u Dr A Chellakumar ula pynpaw ka jingsngew skhem ba ka Congress kan jop ha baroh 2 tylli ki Seat kata na Shillong bad Tura parliamentary seats haka ilekshon MP sha Lok Sabha.
“Ngi don haka jaka kaba biang ban pynsngewthuh iaki paidbag bad 100% Ngin jop ha baroh artylli ki parliament seats,” la ong u Dr Chellakumar haba kren sha ki lad pathai khubor hadien ka jingialang bad ki nongkitkam ka MPCC.
Haba iaroh ia u MP ka Shillong u Bah Vincent H Pala, u Dr Chellakumar ula ong ba ba u MP u badei ruh u president ka MPCC ula leh shibun naka bynta ka Jylla Meghalaya.
“Mynshwa na Tura sha Shillong, ki paidbah ki hap iaid lyngba Guwahati ban wanphai biang sh Shillong hynrei mynta namar ka jingshim khia u Bah Vincent Pala bad ka Sorkar Congress, ki nong shong shnong kila sakhi iaka surok bah (highway). Ki nong shong shnong ka Meghalaya kila ioh ban kynshew pisa bad ka por bad bun ki kam pynroi kila poi shaka Jylla. Dei namar ka jingshim khia u Bah Pala, shibun ki jingmyntoi kila poi shaja constituency bad shaka Jylla Meghalaya,” ula ong.
U heh ka AICC ula kam ba ka Congress kala wanrah iaka North Eastern Hill University (NEHU).
“Ngi la wanrah iaka IIM, NIIT, NIFT bad shibun ki kam pynroi ka Party kala wanrah” ula ong.
U Dr Chellakumar ula ong ki paidbah kila jied iaka Congress hynrei kito kiba shah jied kila shukor bad kila shet kylla iaki paidbah bad iaka Congress.
“Ka lah ban dei namar ka jingbym lah ka Party ban pynsngewthuh iaki paidbah. Ngam ong ba ngim lah namar ki paidbah kila jied iaka Congress hynrei kito kiba shah jied ki shet kylla iaki paidbah bad iaka Party” ula ong.
Haba iadei bad ka sienjam baka MPCC ka shim ban pynkhlain iaka Party, u heh ka AICC ula ong ba kito kiba shah thungkam thymmai ki donkam ban trei borbah ban nang pynkhlain shuh shuh iaka Party.
Ula iathuh ba ka Party kan pyndap iaki kam ba thylli kum haka NSUI, Youth Congress, Mahila Congress, Kisan Cell, ST/SC Cell bad kiwei kiwei.
“Ngi dang pynkhlain shuh shuh iaka Party. Ka Party ka dang im bad kan sa kiew biang” ula ong.
Peit lang ia kane:
