Shillong, Lber 20: Ka jingthep kyrteng jong ki kyrtong ha ki 15 tylli ki constituency ki Jylla ka thain Shatei Lam Mihngi ka Ri, kala sdang hynne ka sngi Balang hadien ka jingpynmih ia ka jingpynbna da ka Election Commission of India (ECI) ia ka phase ba nyngkong jong ka elekshon Lok Sabha ka ban long ha ka 19 tarik Iaiong.
Na kine ki 15 tylli ki constituency, ka jingpynbna ia ka elekshon jong ka Shillong bad ka Tura Parliamentary constituency ruh ka dei kaba la pynmih hynne ka sngi bad ki kyrtong kila lah ban leit thep kyrteng ha la ki jong ki Returning Officer.
Ka jingpynbna ia ka elekshon sha ka Iingdorbar Thaw Ain ba 60 ngut jong ka Arunachal Pradesh bad ka Iingdorbar ba 32 ngut jong ka Sikkim ruh, la pynbna hynne ka sngi Balang, kaba mut ba la sdang ka jingthep kyrteng jong ki kyrtong.
Ka sngi ba khatduh ban thep ia ki kot ki sla da ki kyrtong sha ka elekshon Lok Sabha bad ki elekshon Assembly jong kine ki artylli ki Jylla, ka dei la 27 tarik Lber bad ka jingbishar kyrteng kan long ha ka sngi kaba bud.
Ka sngi ban weng kyrteng ki kyrtong ka dei 30 tarik Lber.
Ka jingniew vote ia ka eleksjon Arunachal Pradesh kan long ha ka 2 tarik Jylliew katba ia ka Lok Sabha kan long ha ka 4 tarik Jylliew.
Na ki 15 tylli ki Lok Sabha constituency ki ban leit sha ka elekshon ha ka 19 tarik Iaiong, san tylli ki dei ha Assam bad mar artylli ha Arunachal Pradesh, Meghalaya, Manipur (kawei shiteng) bad mar kawei ha Mizoram, Nagaland, Tripura bad Sikkim.
Ha ka phase ba-ar ka ban long la 26 tarik Iaiong, ka jingthep vote kan long ha 5 tylli ki constituency ka Assam bad kiwei ki constituency ha Tripura bad kaba sah jong ka Manipur.
Ka jingiathep vote ha ki 4 tylli ki constituency ba sah ka Assam kan long ha ka phase ba lai, ha ka 7 tarik Jymmang.
