Shillong, K’Lyngkot 25 : Katba kiwei ki dang ialyngngai, ka Myntri Sorkar bad kyrtong ka National People Party (NPP) Kong Ampareen Lyngdoh, kala tur shaid shaid sha kylleng ki jaka ban iakynduh paidbah kum ka jingpynkhreh ialade ban mih madan ha ka lympung jong ka elekshon Lok Sabha 2024.
Ka Kong Ampareen hynne ka sngi Palei, kala hiar sa sha Mairang ban pynskhem ia ki Nongkitkam jong ka NPP Mairang Block Committee bad ban iashong jingialang bad kine ki Nongialam na ka bynta ban pynkhreh ia ka elekshon Lok Sabha ka ban sa long ha kine ki khyndiat bnai ban wan.
Ka kong Ampareen kala nang ioh mynsiem ban iakhun ia ka elekshon da ka jingwan pyniasoh bad ai jingkyrshan sa u MDC ka Indian National Congress ka Mairang Bah Batskhem Ryntathiang sha ka NPP, uba la wan ialam lang ia ki nongkyrshan jong u.
Kane ka jingpyniasoh u Bah Batskhem kala nang pynbun ia ka jingdon MDC jong ka NPP kaba synshar mynta ia ka Khasi Hills Autonomous District Council (KHADC) ha ryngkat bad ka Congress.
Kiba la iadonlang ha kane ka sngi ki kynthup ia u Myntri Sorkar barim Bah Hamletson Dohling, ka Kong Jasmine Lyngdoh, Prof Donkupar War nalor kiwei kiwei ki nongialam.
