Shillong, Iaiong 04: U Nongaiktien ka National People’s Party (NPP) Bah Himalaya M Shangpliang ha ka sngi Palei, ula ong ba ka jingthep vote sha ka Congress kan long kumba “phi shong ha ka jhad kaba ngam”.
U Bah Hima ula pynphai kylla ia ka jingkren u President ka Congress bad MP Bah Vincent H Pala halor ka jingkynnoh ba ki paidbah kin tih iala ka thliew jingtep lada ki vote sha ka NPP namar ka dei ka syrngiew jong ka BJP.
“Mano ba kwah ban shong ha ka jhad kaba ngam?. Ha ka jaka ba ki briew kin vote ia ka congress, kan bha ia ki ban vote ia ka NPP, ka ban pynthikna ia ka jingtuid ki kam pynroi sha ka Jylla Meghalaya” ong u bah Hima.
Ula pynkynmaw ruh ba ka NPP kala iatreilang hapoh ka Sorkar NDA ba ialam da ka BJP naduh ka por jong u (L) Purno A Sangma bad Myntri Rangbah Duh Atal Bihari Vajpayee.
“Kam dei ka jingiatreilang ba dang shen bad kane ka jingiatreilang kala don naduh ka por u (L) PA Sangma uba la iakhun ia ka elekshon jong ka kam President ka Ri India” ula ong.
Nalor kane, une u Nongaiktien ka NPP ula ong ba ka Congress kam don lawei shuh ha Jylla ne ha Sorkar Pdeng ruh kumjuh.
“Kan long leh nohei ia ki briew ban vote biang ia ka congress namar ka jaka jong ki ka long ban shong ha ka Liang Pyrshah. Ta ka daw ki paidbah ki dei ban vote ia ka kong Ampareen Lyngdoh khnang ba kan lah ban wanrah ia shibun ki kam pynroi ha ri lum Khasi bad Jaintia bad ki paidbah” ula ong.
Nalor kata, u Bah Shangpliang ula kynnoh ba jan manla ka sngi ki briew kila nang mih nang mih na ka Congress.
“Kiba bun kila wan iasoh sha ka NPP shuwa b aka jhad ka congress kan ngap bad ngi la khmih lynti ba kin dang don bun ki nongtrei ka congress kin sa wan iasoh bad ka NPP ha ki sngi ban dang wan” ula ong.
Kat kum ka jingong jong u, arngut ki MDC ka Congress ha ryngkat ki spah ngut ki nongtrei ha kylleng ka Jylla, kila mih noh na kane ka party bad wan iasoh sha ka NPP.
 Bah Himalaya M Shangpliang ha ka sngi Palei, ula ong ba ka jingthep vote sha ka Congress kan long kumba “phi shong ha ka jhad kaba ngam”.){kind=link}