Guwahati, Jymmang 07 : Katba ka jingiathep vote jong ka elekshon Lok Sabha Phase-III ka dang iaid shakhmat, ka jingkulmar kala mih hapdeng ki arkynhun hapoh ka Polling Booth ha Mankachar, kaba dei jong ka Dhubri Lok Sabha seat.
Kat kum ka kaiphod, kane ka jingjia kala jia ha ka Polling Booth 158 ha Kathalbari ha kaba ka jingkulmar kala mih shabar jong ka jaka thep vote.
Ki bor pahara kila her mar mar sha katei ka polling station ban tehlakam ia ka jinglong jingman.
Wat hapdeng ka jingthut ka suin bneng ha Dhubri, ki nongthep vote la iohi ba kila ieng lain bun bha ban iathep ia ki vote jong ki.
U Khliehduh ka AIUDF Badruddin Ajmal, u kyrtong ka Congress Rakibul Hussain bad u kyrtong ka AGP-BJP Zabed Islam ki dei kiba hakhmat eh ba iakhun ia kane ka elekshon na Dhubri Lok Sabha Seat.
Kane ka constituency ka kynthup ia 55 % ki paid nongthep vote kiba dei ki muslim, 40 % ki hindu bad 5% kiwei ki niam.
Ka Dhubri Lok Sabha seat ka kynthup ia 11 tylli ki assembly constituency kata ka Golokganj, Dhubri, Birsing Jarua, Gauripur, Bilasipara, Mankachar, Jaleswar, Goalpara East, Srijangram, Mandia, bad Chenga.
Kat haduh ka por 11 baje mynstep,ka jingpoi ki nongthep vote kala kot ia ka 27.77%.
