Shillong Lber 28: Ka Kong Finela Lyngdoh Nonglait kaba la pan tiket na ka BJP ban iakhun ia ka elekshon MP, kala ong ba ka pdiang ia ka jingshim rai ki nongialam ba rangbah ka BJP ban kyrshan ia ka NPP khnang ba ka lah ban wanrah ia ka jingbha ia ka jylla.
“Nga don ia ka jingsngewsih namar ba nga la dep ban pynkhreh bha ia ka elekshon hynrei nga pdiang pat ia ka rai kaba la shim da ki nongialam ka BJP na Delhi ioh ka lah ban wanrah ia ka jingbha nangne shakhmat, namar kila shim ia ka rai hadien ba kila iatai bad puson bha” ong ka Kong Finela.
Kala ong, ba wat lada ka BJP ka ai jingkyrshan ia ka NPP ha ka elekshon, hynrei kum ka longkmie kan iengskhem beit ha la ka nongrim ba kan ym iapein ia ki ishu kiba iadei bad ka hok longtrai jong ka jaidbynriew.
“Watla ka BJP kala ai jingkyrshan ia ka NPP, hynrei kadei pat ban don ka jingburom mar kylliang ia ki ishu ki jongki” ong ka Kong Finela.
Kane ka longkmie kala ong, “Watla kam iakhun ia ka elekshon hynrei kan bteng pat ban shimkhia halor ka jingdawa ban pyntreikam ia ka Inner Line Permit (ILP) ha ka jylla namar kane kam dei shuh tang ka jingkwah hynrei kala dei ka jingdonkam ia ka jylla namar ba la pyntreikam ia ka Citizenship Amendment Act (CAA) ha ka ri India baroh kawei”.
Ka Kong Finela kala kitbok kitrwiang ia baroh ki kyrtong kiban iakhun ia ka elekshon MP Lok Sabha na Shillong Constituency bad kala kyntu ruh ia ki, ba kidei ban sangeh ia ka jingkawang ktieh hynrei ba kin pynleit jingmut ban kren ia ki mat kiba kin rah sha Delhi khnang ba ki paidbah kin ioh ia ka jingshai bad ba kin lah ban pynshong nongrim shwa ban ki jied ia ki nongmihkhmat ban leit mihkhmat ia ka jylla hapoh ka Parliament.
Ka Kong Finela kala ai khublei ruh ia baroh ki nongialam bad ki nongkyrshan kiba la ai mynsiem iaka ban iaid shakhmat ha ka jingpynkhreh ia ka elekshon MP Lok Sabha.
“Nga ai khublei ia baroh kiba la ai mynsiem kiba la long kum ka Umphniang ia ka Sharak ka jong nga ba ia ka jingpyrshang ka jong nga halor ka jingthmu ban iakhun ia ka elekshon MP na ka seng BJP. Nga ai khublei khamtam ia ki nongialam u Bah Sanbor Shullai uba la ai ka jingkyrshan met bad mynsiem kum ka para ia nga bad ia u Bah Hek uba long u paralok uba iajan, u Rikman Momin ubadei u President rangbah ka BJP bad ia baroh ki nongkitkam ka seng BJP naduh kiba rit haduh kiba heh bad ia ki paid nongkyrshan” ong ka Kong Finela.
