Jowai, Iaiong 05 : U MP ka Congress na Shillong Bah Vincent H Pala, ula pan ia ka jingkyrshan jong ki paidbah ban pynjop biang ia u kum u MP ha ka sien ba saw ban mihkhmat ia ka Jylla sha Lok Sabha.
U Bah Pala ula pan ia kane ka jingkyrshan na ka rynsan ialap elskhon ba long ha Iawmusiang, Jowai hynne ka sngi Thohdieng ha ka jingdonlang u MLA ka Mawhati Bah Charles Marngar, MDC ka JHADC na Nongkhlieh Bah Richard S Lyngdoh, MDC na Jowai North Brightstar Chyrmang bad kiwei kiwei.
Haba kren ha ka jingialang, u Bah Pala ula pyntip ba ha kine ki lai samoi kum u MP ka Shillong, ula wanrah ia shibun ki kam pynroi ha ka thain la ka dei ia ki surok, ka koit ka khiah, ka pule dangle bad kiwei kiwei.
Ula pan ia ka jingkyrshan jong ki paidbah khnang ba un lah pyndep ia ki project ba dang sah hapoh ka constituency.
U Bah Pala ula kren ruh halor ka manifesto jong ka party kaba la pyllait paidbah hynne ka sngi ha New Delhi.
Ki Nongialam ka Congress kila buh ia ka jingkyrpad hakhmat u paidbah ba kin ai biang ia ka jingshaniah ha u bah Pala ha ka sien kaba saw.
