Tura, Iaiong 19 : U National President ka NPP bad Myntri Rangbah ka Jylla Conrad K Sangma ula niah hi dalade ia ka kali ban leit sha Polling Station ha Tura bad hap haduh 2.5 kynta ban pyndep iala ka kamram ban jied nongmihkhmat sha Lok Sabha.
U Conrad ula poi sha Walbakgre Polling Station ha ka por 6:30 baje mynstep da ka jingkyrmen ban long uwei na ki nongthep vote ba kloi eh hynrei ula hap ap haduh 2.5 kynta tam ban ioh thep iaka vote.
Haba iakren bad ka Shlem, ula pynpaw ia ka jingkyrmen halor ka jingmih ki paidbah ban thep vote. Ula pyntip ba ula ai shuti ia ki Pulit pahara, u nongniah kali bad ka kynhun ba bud ia u, ba kin leit ban thep vote.
Ula jied ban niah hi dalade ia ka kali nala ka iingsah sha Polling Station hynne ka step.
“Baroh na ki nongbud na ka kynhun kila leit shala ki jong ki jaka ban leit thep vote. Tang katta katne ki nong pahara na ka District, kiba la dep thep vote ki don bad nga mynta” ula ong.
