Shillong, Naiwieng 30 : Ki Nongialam bad Nongkitkam ka National People’s Party (NPP) na Ri-lum Jaintia kila ai ia ka jing kyrshan ba pura sha ka kyrtong iakhun MP-Lok Sabha ka Party na Shillong Dr Mazel Ampareen Lyngdoh hynne ka sngi Palei.
Kane ka rai kala mih na ka jingialang iasyllok kam hapdeng ka kyrtong bad ki Nongialam na Ri-lum Jaintia, kaba long ha State Convention Centre, kaba la sakhi ruh ia ka jingiashimbynta jong baroh ki MLA bad MDC ka Ri-lum Jaintia ba kynthup ia u Symbud Myntri Rangbah ka jylla Bah Sniawbhalang Dhar, Myntri ka sorkar jylla u Bah Comingone Ymbon, ki MLA kiba kynthup ia u Bah Wailadmiki Shylla bad ka Kong Santa Mary Shylla, u CEM ka JHADC u Bah Thombor Shiwat bad ki MDC jongka JHADC.
Ka NPP kala ot ribbon ruh ia ka jingiaid ialap elekshon Lok Sabha na kane ka jingialang.
U Symbud Myntri Rangbah ka Jylla Sniawbhalang Dhar ula pyntip ba ka NPP naduh lashai ka sngi kan sdang ban leit iuhkjat ha manla ki District ban ialap elekshon na ka bynta ka kyrtong.
Ha kajuh ka por, ka Kong Ampareen kala pynpaw ia ka jingsngewnguh ia ki Nongialam ka NPP kiba la iawan khrui, kaba long kum ka jingai mynsiem. “Nga kular ba ngan trei shitom bha bad ban shakri hok ia ki paidbah” kala ong.
Haba ai jingkren kum ka kyrtong, ka Kong Ampareen kala pynpaw iaka jingsngewnguh ia ka seng NPP kaba jied ia ka ban iakhun iaka elekshon haba pyntip ba shen kan sa leit iuhkjat ha manla ki shnong jong ka Ri-lum Jaintia.
Ka kong Ampareen la pynkynmaw ruh ba ka Jaintia Hills da kawei ka sur kala pynjop don burom ia u Bah Peter G Marbaniang (Bam Kwai ha Dwar u Blei), uba long u kpa jongka bad ka dap da ka jingkmen ba ka ioh ia ka lad ban iakhun ia elekshon MP bad ban buddien ia ki dienjat kiba la ialam da u kpa jong ka.
“Ngan ialeh ban jop, hynrei ngan ym jop khlem ka jingjyrshan ka jong phi. Leit sha ki shnong ban iathuh khana sha ki paidbah ba nga la khreh ban long ka nongshakri ia phi. Ngan pyrshang katba lah ban pynbit pynbiang ia phi bad ngan pyrshang katba lah ban ym leh shilliang la ka long ha ka niam ne kiwei kiwei. Ai ia nga ka lad ban pyni ia ka kamram jong ka MP” ong ka Kong Ampareen.
Kala kyntu ia ki nongkitkam ka NPP na rilum Jaintia ba kin leit ban pynsngewthuh ia ki paidbah ba kin kyrshan ia ka bad kala ong ba kan ym pynsepei ia ka jingkyrshan ka jong ki paidbah.
