Shillong, Iaiong 19 : Ka elekshon Lok Sabha ha Jylla Meghalaya kala thnem bad hui hui bha bad kat haduh ka por 3 baje janmiet, ka jingiapoi thep vote ki briew kala kot sha ka 62.94 %.
Kane ka jingiamih paidbah ban pyndep iala ka kamram ban jied Nongmihkhmat sha Lok Sabha, ka dei ruh namar ka jing shongshit jong ki rynsan ialap elekshon jong ki seng sain pyrthei bapher bapher ha kine ki 20 sngi bala leit noh, kaba la sakhi ia ka jingiakawang ktieh kaba jur hapdeng ka Liang Synshar bad Liang Pyrshah.
Kat kum ka jingai jingkhein ka Tnad Election ka Jylla, ka jingpoi thep vote haduh ka por 3 baje janmiet ha baroh artylli ki constituency kala kot ia ka 62.94 %.
Ha Shillong, kiba la poi ban pyndep ia ka jingthep vote kala kot 61.18 percent katba ha Tura kala kot ia ka 63.23%.
Ka NPP kaba don ha ka bor Synshar kala pynieng kyrtong ha baroh artylli ki constituency ka Jylla-ka Shillong bad Tura katba ki seng riewlum kila iatreilang hapoh ka lama jong ka RDA ban pynieng kyrtong nalor ka VPP.
Ka jingiathep vote haduh mynta mynne kala iaid suk bad iaid beit iaid ryntih ha baroh 36 tylli ki constituency ka Shillong bad ki 24 tylli ki constituency ka Tura.
