Nongpoh, Nohprah 20 : Ka Nongialam ka NPP bad kyrtong ban iakhun ia ka elekshon MP-Lok Sabha na Shillong Parliamentary constituency Dr Ampareen Lyngdoh, hynne ka sngi Balang, kala hiar ban pynskhem ia ki nongkitkam ba thymmai ka NPP Ri-Bhoi District bad ki Block Committee bapher bapher, ban pynkhlain bad pynsuh thied ia ka Party hapoh ka District hashuwa ka elekshon Lok Sabha bad MDC ban long ha u snem ban wan.
Haba kren ha ka jingialang, ka Dr Ampareen kaba dei ruh ka Myntri ha ka Sorkar Jylla, kala kyntu ia ki Nongialam ka Party ha Ri-Bhoi ba kin hap pynkhreh bha, hap pynskhem bad hap trei shitom ban pyni ia u paidbah ka District ba ka NPP ka dei ka party kaba wan sha u paidbah ban ai ka jingshakri kaba bha tam.
Ka Dr Ampareen kala sot ia ka jingkren ki Nongialam na Ri-Bhoi ba pyntip ba haduh 50% tam ka NPP kala ioh ia ka jingkyr shan (vote) ha ka elekshon MLA-2023 hapoh ka District bad ong “Kane ka mut ba ka jingdon jong ngi (NPP) ha ka District ka dei kaba la bit la biang bha. Hynrei nangne shakhmat, ngin hap ban nang trei shitom ban pynthikna ba ka Party kan ioh kheit ia u soh uba thiang ha ka elekshon ban wan” kala ong.
Ka Dr Ampareen kala ong “Ka NPP kala ioh arngut ki MLA na Ri-Bhoi bad kine ki dei ki rishot bad ki paia ha ka thain bad ka jingdon jong kine arngut ka long ka jingai mynsiem haba phai ia ka jingioh jingkyrshan ka NPP ha ka elekshon ba dang shu dep”.
Haba kren halor ka jingtreikam jong ka Sorkar Jylla ba ialam da ka NPP, ka Dr Ampareen kala ong “Ha ki khyndiat bnai mar syn dep ka elekshon (MLA), ka Sorkar kala pyniaid shakhmat ia kiba bun ki kam la ka dei ha ka Tnad PWD, Health, PHE ne Agriculture bad kala lah ruh ban lum ban lang ha kaban pyrkhat thymmai kumno ban aibor ia u paidbah ba kin roi ha ki kam ba ki trei bad ka imlang sahlang ruh kumjuh hapoh baroh kawei ka Jylla”.
“Ka Sorkar NPP hapoh ka jingialam u Myntri Rangbah ba stad ba shemphang Conrad K Sangma, kala wanrah ia ki prokram bapher bapher ban pynkupbor ia ki paidbah naduh ki Nongrep, ki samla ba kin sengkam sengjam, ki seng longkmie, ki nongialehkai bad ki riew don sap ha ki sap bapher bapher” kala ong.
“Ka Sorkar MDA ka dei ka Sorkar u paidbah bad kam ju shongthait ban pyrkhat ia kaei kaba ka donkam ban leh ha kaban kyntiew ia ka jingim jong ki paid nongshongshnong ka Jylla” kala bynrap.
Kiwei ki Nongialam ka NPP kila buh ka jingkyntu ia ki Nongialam jong ka District bad ki Block ba kin trei shitom ha kaban pynsuhthied ia ka party hapoh ka District bad ban sdang iaid noh sha manla ki shnong ban pynshai ia ki nongrim treikam jong ka party.
Ki nongkitkam ba thymmai ka NPP RiBhoi District ki long u Bah Clement Mawlong kum u President, Bah RM Mukhim Working President, Henry Nongrum, Bimol Saikia bad Bah WS Ryntahtiang kum ki Vice President, 5 ngut ki Secretary ba kynthup ïa u Donbok Kharnaior, Bishar Timung, Victor Rani, Lurshai Kharnaior bad u Bah Shalanbok Sylliang.
Ki Nongkitkam ba thymmai jong ki Block Committee ki kynthup ia u Bah Sosthenes Sohtun, MLA ka Jirang Konstituensi kum u president ka Jirang Block, u Bah Jason Mawlong MLA barim ka Umsning kum u President ka Umsning Block, Bah Damanbait Lamare MLA ka Umroi kum u President ka Umroi Block, Bah Shemphang Lyngdoh Block President ka Mawhati bad u Bah Henry Nongrum kum u President ka Nongpoh Block.
Kiba la iadonlang ha kane ka sngi ki kynthup ia u Bah Hamletson Dohling, State Working President, u Prof. Donkupar War, Secretary ka NPP Meghalaya Unit, u Bah Samlin Malngiang, Secretary In-charge ka Ri Bhoi bad kiwei kiwei.
