Shillong, Lber 25: Ka kyrtong ka NPP na shillong Parliamentary seat Kong Ampareen Lyngdoh ha ka sngi Nyngkong, kala ong ba ki don katto katne ki seng sain pyrthei kiba la ioh ia ka jingkyrshan na ki nongbei tyngka ban pynsaphriang ia ki khubor lamler hapoh ki rynsan social media ha kane ka elekshon Lok Sabha.
Haba iakren bad ki nongthoh khubor, ka kong Ampareen kala ong “Ban pyndonkam ia ki social media katne katne kumba phi iohi mynta, khlem ka jingdon ki nongbei tyngka ha lyndet, kan long kaba eh bha. Kane ka mut ba ki don ki briew kiba iarap na sha lyndet bad kila shim ia ka bynta kaba khraw bha. Ngi na ka NPP, ngi la pyrshang ban pynphai kylla ia ki khubor lamler jong ki social media da ki briew lajong”.
Kane ka jingkynthoh (kaba jer jer kyrteng iano iano ruh), kala thew sha ka social media campaign jong ka Liang Pyrshah Voice of the People Party (VPP).
“Ban pyndonkam ia ki social media ha ka por elekshon ka long kaba rem dor bha. Mano ban shu trei ei ia phi?. Phi donkam ban pynbit pynbiang ialade bad khlem ka jingkyrshan, phin ym lah ban shu pynlut nalade” ong ka kong Ampareen.
“Nga iohi ba kane hi ka dei kaba don ki nongbei tyngka da mano re mano iano re iano. Ka dei kaba remdor bha. Wat ong ba ki dei ki nongtrei (cadre) ka party hynrei kim don nongtrei satia. Ki party kum jong ngi ki don ia ki nongtrei, ngi don ia ki Block bad ki Unit ha manla ki shnong haba ianujor bad kiwei ki party. Don mano re mano ba kyrshan ia ki ban pynphriang ia ki khubor lamler. Namar kata, ki paidbah ki dei ban tip bad husiar bha” kala ong.
