Shillong, K’Lyngkot 04: U national vice President ka BJP u ba khmih iaka Meghalaya u Dr M Chuba Ao ula ong baka Party ka don iaka thong ban ioh 400 tylli ki Seats haka ilekshon MP Lok Sabha 2024.
Haba kren sha ki lad pathai khubor hadien ka jingialang hynne ka sngi u Ao ula ong “Ka thong ka long ban ioh 400 tylli ki Seat bad ka Party kan nang trei bha shuh shuh palat iaki snem bala dep”.
Haba pynksan baka kaiphod jong ka Party ka long kaba don jingkyrmen ula ong “Ngi kyrmen ba ngin ioh iaka jingjop bad kadei ka thong mynta ka sngi”.
U Ao ula kubur ba ki don katto katne ki Seat baka Party ka tlot bad naka liang ka Party kan trei shitom ban ioh jingjop ha kum kita ki seat.
“Haki artylli ki ilekshon ba dang shu dep, ngi la sakhi baka Party kam ioh jingjop hynrei mynta ka kynti ngin trei shitom ban pynsngewthuh iaki paidbah khamtam haba iadei bad ka national level bad kumno ban pynpoi sha man ki paidbah” ula ong.
U nongialam ka BJP ula ong ruh baka Party kan iakhun haka ilekshon MP marwei daka ba ong “Ka Party kam iapein bad kiwei ki seng sain pyrthei. Ngin pynkhlain iala ka Party, balei ngin ailad ia kiwei. Namar kata ka BJP kan iakhun marwei bad kam treh satia ban ia sam Seat”.
Haba kylli, u Ao ula ong baka BJP Meghalaya ka khlain ha baroh artylli ki Seat kata ha Shillong bad Tura parliament seats.
“Haka jingshisha, Ngi khlain ha baroh artylli ki Seat, ngi la rai ban nang pynkhlain shuh shuh iaka party daka ba pynsngewthuh iaki paidbah ha baroh ki kyrdan” ula ong.
Haba kylli hato ka Party kala rai ne em iala ki kyrtong, u Ao ula ong “Ngi dang trei bad halor kane ka Party kan sa bishar bniah bad iaka rai yn shim daki nongialam ka Party na Delhi haka jingdon lang u Myntri Rangbahduh bad u Myntri ka tnat kam pohing ka Ri halor ka jingsam Ticket”.
Ula ong ba kila don bun ngut kiba pan Ticket naka Party hynrei kiba pan Ticket kidei ban shah pdiang bad ki paidbah.
Haba kylli hato ka Party kan pynieng ne em ia u MLA ka Pynthorumkhrah u Bah A. L Hek u badei ruh u Myntri Sorkar, u Ao ula ong “Nga la iohi haki lad pathai khubor hynrei ngam pat iakren bad ia kane ka Party kan sa iakren namar ym lah ban shu ngeit ia kaei ba thoh haka kot hynrei donkam ban iakren markhmat”.
Ula pynksan baka Party kan jied daki dkhot bad nongkitkam jong ka BJP.
“Ka jingbhah kyrpang iaki kynthei kadei ka Agenda jong ka Party. Ngin sa peit namar ka bhah kyrpang kam thew ba dei beit ban pyniakhun daka kynthei namar ka lah ban don ki Constituency ba ki paidbah kim pdiang iaka namar kata donkam ban jied kyrtong da kiba kynsai” ula ong.
