Shillong, Rymphang 03 : U MLA ka United Democratic Party (UDP) na Sohiong Bah Synsharlang Kupar Lyngdoh ha ka sngi Nyngkong, ula thep kyrteng kum u kyrtong ka UDP ban aireng na Sohiong-Nongspung ha ka elekshon MDC haba ban jur ia ka jingdon kam ba dei ban shna noh ia ka map bad u pud u sam ba thikna jong ki Hima bapher bapher.
Haba kren sha ki nongthoh khubor, u Bah Synshar ula ong ba ka rai jong u ban iakhun hi ia ka elekshon ka dei namar ka jingkwah bad ka mon jong ki paidbah ka Constituency.
Une u MLA ula kyntait jur ba ka don ka jingiasngewthuh bakla hapoh ka Iing ka sem hadien ka rai jong u Khun u Kni (L) Bah HDR Lyngdoh, u Nathaniel Rymmai ba un iakhun ia ka elekshon na ka ticket ka congress.
“Kam don satia kano kano ka jingbym iasngewthuh jingmut hapoh ka Iing. Ka dei ka ri synshar paidbah bad mano mano ruh ki lah ban iakhun ia ka elekshon. Kino kino kiba kwah ban iakhun ai ba kin iakhun” ula ong.
U Bah Synshar ula ban jur ia ka jingdonkam ban pynkhlain ia ki ain bala don lypa hapoh KHADC bad ong “Na ka kyrtong jong ka constituency hi, ngi tip ba ki don artylli ki Hima-ka Sohiong bad Nongspung. Ki don ruh ki shnat jong kine ki Hima-ka Nongwah Mawytamur kaba don ha khappud ka Assam bad kaba donkam ban pynthikna ba ka jingsuk kan don ha katei ka jaka”.
Une u MLA ula ban jur ruh ia ka jingdonkam ki synshar khadar ha ki shnong ki thaw bad ong “Nga kwah ruh ba ki Hima kin don noh ia u pud u sam bad ka map kaba thikna”.
Haba kylli, u Bah Synshar ula ong “Ngi la pynkhreh bha ban iakhun ia kane ka elekshon kum ka party bad ngin pyrshang kat kaba lah ban jop”.
“Ngim lah ban thied ia ki paidbah da ka pisa bad dei namar kata ngi la leit sha ki paidbah da ka jingieid bad nga kyrpad ia ki paidbah ba kin kyrshan ia nga kum u kyrtong khnang ba ngan jop ia ka elekshon ADC” ula bynrap.
