Mawkyrwat, Rymphang 14 : U National President ka National People’s Party (NPP) bad Myntri Rangbah ka Jylla Conrad K. Sangma ha ka 13 tarik u Rymphang, ula iaid ialap elekshon ha kylleng ki shnong kiba hap hapoh ka Mawkyrwat constituency ban pan jingkyrshan ia u kyrtong bad MDC ba mynta Bah Carnes Sohshang ha kane ka elekshon KHADC, ban long la 21 tarik Rymphang.
U Myntri Rangbah ula leit ban ialap elekshonha Sngimawlein, Mawthawpdah, Umdohlun, Mawpat, Mawlangwir, Mawkyrwat, Rangmaw bad ha Sakwang.
Haba kren na ki rynsan, u Conrad ula ong “Kane ka thain ka dei kaba la shah iehbein la slem bha. Ngi, kum ka party bad ka Sorkar, ngi kwah ban wanrah ia ka roi ka par kaba phi dei hok ban ioh. Ha nga hi, ban lah trei bad wanrah ia ki kam pynroi, nga donkam ia ka kynhun, nga donkam ia ki briew, nga donkam ia ka lynti. Ta ka daw kane ka elekshon ban wan ka long kaba kongsan ia kine ki shnong ka thain bad ka constituency”.
Ula ong ruh ba ki don ki seng sain pyrthei kiba pyrshang ban pyniapait iapra, wanrah ia ki mat pyrshah Sorkar bad pynmih ia ki jingkynnoh. “Ngam kwah ban ong eiei halor jong ki namar ngam ngeit ha ka sain pyrthei kaba kynthoh pyrshah. Kaei kaba nga kwah ong ha phi ka long ba haba kut ka elekshon bad ka result kala mih ha ka 24 tarik Rymphang, baroh ki seng sain pyrthei kiba la wan ialap da ki sur ba pyrshah Sorkar kin nym don shuh hangne, bad ngin long biang kum ki riew paidbah, kum ka shnong, bad kum ka constituency, kiba khmih lynti ba ngi dei ban ioh ia ka CHC lajong bad ki surok (ki kam pynroi)”.
Une u National President ka NPP ula kyntu ia ki paidbah ban buh hakhmat eh ia ka roi ka par bad ban vote ia ka party (NPP) kaba lah ban wanrah ia kata. “Ka party kaba lah ban leh ia kata bad ban wanrah ia ka roi ka par ka dei tang ka NPP ym kiwei kiwei. Ta ka daw kane ka elekshon ka long kaba kongsan bha” ula ong.
U Conrad ula kyntu ia ki paidbah ban kin iatreilang. “Kane ka elekshon ban wan ka dei ka kabu ia ngi ban wanrah ia ka jingkylla ha ka constituency bad ka thain, bad ban iatrei ryngkat ryngkat bad ka Sorkar”.
U Myntri Rangbah ula ong ba ka Sorkar NPP kan iatreilang bad ki paidbah la ka dei ha ka por ba kmen ne ba sngewsih ban pynthikna ba ka jingkylla bad ka roi ka par kan wan.
U Conrad ula iaroh ia u Bah Carnes Sohshang halor ka jinglong sngewrit badong “Nga kyrpad ia phi baroh ban peit ia ka jinglong u Nongialam. U bah Carnes ula don ia ka jinglong baroh ban long u nongialam uba bha, ba sngewrit bad uba lah ban trei ia ka kam.
Nga sngew ba phi baroh phi dei ban kyrshan ia u ha baroh ki liang”.
Ula kyntu ruh ia ki paidbah ba kin buh lang dohnud bad ka jingmut jingpyrkhat, ban trei ha ka rukom kaba tei, bad ban iaid shakhmat.
