Shillong, Rymphang 09 : U kyrtong ka NPP na Langkyrdem-Laitkroh Bah Rahboklang Tynsong ula pynpaw ba um kwah satia ban ai kano kano ka jingkular thok ia ki paidbah ka constituency.
“Nga khlem wan hangne ban ai kano kano ka jingkular thok hynrei nga kular ba ngan iai don beit ha syndah bad phi haba phi mad ia kano kano ka jingeh. Phin ym iakhun ia ki jingeh tang marwei” ong u Bah Rahboklang haba pan ia ka jingkyrshan na u paidbah ha ka jingialap elekshon ha Laitlyngkot, Nongkynroh ha ka sngi Saitjain.
Ula kyntu ruh ia ki paidbah ba kin shim ia ka kabu ha kane ka elekshon MDC bad ong ba lada u shah jied, ka constituency kan ioh ia u MDC, u MLA bad u Symbud Myntri Rangbah, ki ban trei na ka bynta ka bha ka miat bad ka jingmyntoi jong u paidbah.
“Nga kular ia phi ba ma nga, u mama jong nga Bah Prestone bad ka party kan iadon ryngkat beit bad phi katba ngi dang im” ong u Bah Rahboklang.
Kat kum ka jingong jong u, ka NPP kala leh shibun kiei kiei na ka bynta ki paidbah ka Nongkynrih bad kan iai bteng ban leh ia ki kam ba bha lada ai ka lad ia ka ha kane ka elekshon ADC.
