Shillong, K’lyngkot 31: U MDC ka Mawlai Bah Teiborlang Pathaw ha ka sngi Thohdieng, ula kular ban wanrah shuh shuh ia bun bah ki kam pynroi ha Mawlai ki ban ai jingmyntoi bad ka bha ka miat ia ki nongshongshnong kaConstituency lada u shah jied biang ban mihkhmat sha Khasi Hills Autonomous District Council (KHADC).
U Bah Teiborlang ula thep kyrteng hynne ka sngi Thohdieng kum u kyrtong shimet ha ISBT, Mawlai Mawiong hadien ba ula iehnohkam na ka National People’s Party (NPP) hashuwa ban pynbna ia ka elekshon, ka ban long la 21 tarik Rymphang.
Haba iakren bad ki lad pathai khubor, u Bah Teibor ula pynpaw ba ula noh synniang shibun eh ia ka constituency ha kine ki hynriew snem bala leit.
“Nga la trei shitom bha bad mynta nga ieh ha ka jingstad ki paidbah ka Mawlai ban rai la kin jied biang ia nga sa shisien kum u Nongialam jong ki namar kila iohi ia ka jingnoh synniang jong nga sha ka constituency lyngba ki kam pynroi bapher bapher” ula bynrap.
Ula kam ruh ba ka Executive Committee ba mynta jong ka KHADC kala treikam bha khamtam eh ha ka jingmynjur ia kiba bun ki bill ba kongsan ki ban iarap ha kaban nang pynkhlain bad ai jingiada ia ki paid trai ri trai muluk.
“Ka Land Act, kaba ioh jingmynjur dang shen na u Lat ka Jylla, kan dei dei ka jingkyrkhu kaba khraw ia ki paidbah jong ka thain” ong u Bah Teiborlang.
Une u MDC ula kular ruh “Lada nga shah jied biang kum u MDC, nga kular ba ngan nang bteng shuh shuh ban trei shitom namar ki dang don shibun ki kam ba donkam ba hap ban leh na ka bynta ka roi ka par bad ka jingkiew shaphrang jong ka Mawlai constituency”.
Haba kylli, u Bah Teibor ula pynshai ba ula jop ia ka elekshon 2019 kum u kyrtong shimet bad mynta ka kynti ruh ki paidbah ka constituency ki kwah ia u ban iakhun kum u kyrtong shimet.
Kat kum ka jingong jong u, ka party hi ka dei tang ka uniform, kaba kongsan eh ka dei hi u briew”. “Lada nga jop, ngan hap ban trei ym na ka bynta ka party hynrei na ka bynta u paidbah” ula ong.
