Shillong Rymphang 21: U Kyrtong ka Congress na Laitumkhrah-Malki u Bah Manuel Badwar ha ka sngi Thohdieng ula kyntu ia ki seng sain pyrthei ba dawa pyntreikam ia ka Article 371, ba ki dei ban shong iatai shwa, ha ka jaka ba kin leit beit sha u paidbah tang katkum ka jingsngewthuh ka jong ki halor katei ka sobjek.
Haba iakren bad ki nongpathai khubor hadien ka jingthep vote, u Bah Badwar ula ong, “Nga kyntu ia kito ki seng sain pyrthei kiba dawa ia ka Article 371 ban iatai shwa halor kane ka mat da kaba ia shong pyrkhat lang ym ban shu leit tang sha u paidbah tang da ka jingsngewthuh ka jongki hi”.
“Kum katei ka mat ka donkam ban ioh ia ka jingmynjur na baroh, lem kumta ban shu leit beit sha u paidbah bad ban ong ba ngi dawa ia kane ka pyni ka jingbym pat rangabh ka jingmut ka jongki.Phim lah ban ong, ba kaei kaba kwah ma phi ka long kaba dei. Ka kam sain pyrthei kadei ruh da kaba iasyllok na ka bynta ka bha ka miat jong u paidbah”.
U Bah Manuel Badwar ula ong ba ka Article 371 kan pyntroin ia ki Autonomous District Council (ADC) bad kan pyntlot ruh ia ka jingiada kaba ai sha ki trai ri trai muluk lyngba ka Sixth Schedule jong ka riti synshar ka ri.
“Kumta, kan long kaba bha shbun ban kiar ban ai ia kano kano ka rai bad ban ailad ia ki riewstad halor kane ka sobjek kin iatai sani bad ban poi sha ka jingmynjur lang. Lada nga hap ban iatai halor kane ka mat, nga ngan ieng pyrshah jur (ia ka Article 371),” ula ong.
Ula pynpaw ia ka jingskhem jingmut ba un jop ia ka elekshon MDC bad ong, “Ngi lah leit rung ha man la ki iing ki sen bad ngi lah pynpaw ia ki mat bad ia ki nongrim jong ka seng. Kumta nga shaniah skhem ba ngin jop ia kane ka elekshon”.
Hynrei ula pynpaw pat ia ka jingsngewkhia ban iohi ia ka jingdon ki briew kiba ieng shabar jong ka jaka thep vote bad ula ong, “Kaba sngewsih ba ki dang don ki briew kiba dang ap ban ioh ia ka pisa. Nga kynnoh beit ia ka rukom long ha ka liang ka pule puthi namar ba kim pat sngewthuh bad nga sngew ba ki nongmihkhmat paidbah jong katei ka thain kidei ban kiar na ka jingpyndonkam da ka pisa. Hynrei kiba bun hi ki briew ha Nongmynsong kidei kiba la long rangbah bha ha kaba kin ym pynpaw hi ruh iano kila kyrshan ne thep vote”.
Haba kren halor ki mat kiba la pynsngew da ka seng ban ioh iaka jingkyrshan kaba pura na u paidbah, u Bah Manuel Badwar ula ong ba ka seng kala pynthikna ba kan wanrah ia ki ain ki kanun kiba khlain ryngkat bad ka jingbhah kam ha ki kam ki bym dei satia ki kam sorkar ban pynthikna ba dei ban ailad shwa ia ki samla trai ri ban ioh kam ha ki kyrdan bapher bapher.
“Ka long kaba donkam ban don ia ki kyndon kiba tyngeh lada ngi dei ban ai jingbit ia ki karkhana. Kadei ban don ka jingbhah kam na ka bynta ki samla trai ri ki jong ngi bad dei ruh ban ai jinghikai pyntbit ia ki khnang ba kin lah ban bat ia ki kam ha ki kyrdan kiba heh” ula ong.
Nalor kane, ula banjur ruh ba ka long kaba kongsan ia ki District Council ba kin pynmih ia ki jingai jingmut kiba kongsan na ka bynta ban kyntiew ia ka pule puthi bad ki District Council kim dei ban kylla long tang kum ki jaka kiba shu lum tang ia ka khajna.
