Elekshon JHADC | Kyrpad u DyCM ia ki paidbah ban vote ia ka NPP | “Ka trei bun bad kren duna”

Shillong, Rymphang 13 : U National General Secretary ka National People’s Party (NPP) bad Symbud Myntri Rangbah Bah Sniawbhalang Dhar ha ka sngi Palei, ula kyrpad ia ki paidbah ka Ri-lum Jaintia ban vote ia ka NPP ha kane ka elekshon JHADC ban wan namar ka party ka dei kaba “Trei kham bun bad kren duna”.

Haba kren ha ka rynsan ialap elekshon ha shnong Iongkaluh ban pan jingkyrshan ia u Bah Phasmos Dkhar, u MDC bala arsamoi ka NPP na Musniang-Rangad, u Bah Dhar ula ong “Ha ka por elekshon, kiwei ki seng sain pyrthei kin wan bad kular shibun kiei kiei hynrei phi dei ban kynmaw ba ka NPP ka dei ka party kaba kren tang 2% bad trei pat haduh 98%”.

“Ki don kito kiba kynnoh ba ka NPP kala leh ia ki kam synshar donbor bad leh shiliang hynrei lada ngi leh shisha ia kata, balei pat ba ngi theh da ki klur tyngka sha ki kam pynroi ha ka constituency kum ka Khliehriat, kaba don u MLA uba dei na ka United Democratic Party (UDP). Ngi la bei da ki klur tyngka ki kam pynroi na ka bynta ka jingmyntoi bad ka bha ka miat u paidbah. Kumta, nga kyrpad ia ki paidbah ba kin rai da ka jingstad hashuwa ba kin thep vote. Kane ka long namar kawei ka vote ka im haduh 1825 sngi kaba mut 5 snem” ula ong.

Haba kyntu ruh ia ki paidbah ka Iongkaluh ban ai ka jinshaniah ha ka NPP da kaba jied biang ia u Bah Dkhar sa shisien, u Symbud Myntri Rangbah ula ong “Nga kyrpad ia ki paidbah ba kin vote ia u (Dkhar) lada phi kwah ia ka Sorkar ba don ar engine. Ym tang katta, vote ia u namar u dei u nongia lam uba la shemphang bad ula dei ruh u Executive Member (EM), uba la trei shitom bad noh synniang shikatdei eh ia ka constituency bad ka thain”.

“Kumta, pynthikna ba un ioh palat 1200 vote bad hadien ka elekshon, u lah ban pynthut ia ka ha kano kano ka kam ba iadei bad ka shnong jong phi” ong u Bah Sniawbha.

Nalor kane, une u Nongialam ka NPP ula ong ba kam donkam satia ban sheptieng ia ka Liang Pyrshah Voice of the People Party (VPP) namar tang kito ki bym kwah ia ka roi ka par ba shisha kin vote ia ki.

“Nga shim ruh ia kane ka kabu ban kyrpad ia baroh ki paidbah ba kin ym pynsepei kai ia ki vote jong ki “na ki jingrwai elekshon ba bang” hynrei ban thep ia ki vote na ka bynta ka roi ka par” ula ong haba kam ba ka NPP kala lah ban wanrah ia ka roi ka par da ki klur bad phew klur tyngka tang ha kine ki 7 snem ba la ialam ia ka Sorkar hapoh ka Jylla.

“Ki briew ki kynnoh laiphew jait ia ngi namar ngi dei ka Sorkar kaba treikam. Ka Sorkar ka bym shah kynnoh kadei ka Sorkar ka bym treikam eiei ruh em. Kumta, nga kyrpad ia phi ban vote ia ka NPP ban ioh ia ka Sorkar kaba skhem” ula ong.

U Bah Sniawbha ula iathuh lypa ruh ba ka VPP kan ym tam ia ka jingioh MDC ba palat 6 ngut ha kane ka elekshon ADC bad ong “Ha kane ka kynti, ngam tahrai ba kin jop palat ia ka 6 seat namar ki paidbah kila sngewthuh ba ka sepei ban jop lada kam don ka roi ka par”.

Haba kren ha ka jingialang,u Bah Phasmos Dkhar ula kular ban bteng ha kaban wanrah ia ka roi ka par hapoh ka constituency lada u shah jied biang kum u MDC. “Ki dang don shibun ki kam kiba nga hap ban leh eiei lada nga shah jied bad kane ka urlong tang lada phi ai ka jingshaniah ha nga kum u MDC jong phi”.