Guwahati, Iaiong 1: U Myntri Rangbahduh ka Ri, Narendra Modi, ha ka sngi Balang, u la sdang ïa ka jingïalap election na ka bynta ka BJP sha ka Ïingdorbar thaw ain ka jylla Assam, da kaba kynthoh jur ïa ka Congress, halor ka jingpyrshang jong ka, ha ki por ba la dep, ban wanrah ïa ka “communal violence law” bad kynnoh ba ka seng ka leh politik na ka bynta ka vote-bank.
Haba kren ha ka rally kaba nyngkong jong u ha Gogamukh ha Dhemaji district, u Modi u la kynnoh ba ka sorkar UPA ba la ialam da ka Congress ka la pyrshang ban wanrah ia ka ain pyrshah ia ka jingiathombor “communal” ha shwa ka elekshon Lok Sabbha 2014.
“Shwa ka elekshon 2014, ka Congress ka la pyrshang ban thaw ïa ka Communal Violence Law ban pynhun ïa ka fixed vote bank jong ka.La shim ba ki jaidbynriew kiba bun paid ki don ka jingkitkhlieh na ka bynta ki jingkulmar, katba ki jaidbynriew rit paid la shim ba ki dei ki nongshah pyndik.Ka BJP-NDAka pyrshah ia kane ka Bill,” ong u Modi.
Da kaba khot ia ka Congress kaba “ma” ia ka jylla, u Myntri Rangbah duh u la kynnoh ia ka seng ba ka buh hakhmat eh ia ka jingpynsngewbha ban ia ka jingsynshar bad u la maham ia ki nongthep vote ba kin long kiba husiar.
Haba niew ïa ka jingthep vote ban wan kum kaba kongsan bha na ka bynta ka lawei jong ka India, u Modi u la ong, “Kane ka elekshon ka dei halor ka jingtei ïa ka Viksit Bharat.Ka BJP kan thaw sorkar biang ha Assam bad ban pyndep ïa ka hat-trick.”
Haba pynpaw ïa ki jingthmu jong ka bha ka miat bad ka roi ka par, u Modi u la ong ba palat 15 lak tylli ki longïing kin ïoh jingmyntoi na ka Pradhan Mantri Awas Yojana, katba u kular ruh ban ai ïing na ka bynta baroh ki nongïoh jingmyntoi kiba dei hok. U la pynbna ruh ban pynbor ia ka “jinghikai khlem jingsiew naduh KG haduh PG” na ka bynta ki longiing kiba duk.
Da kaba pynïapher bad ki sorkar Congress kiba mynshuwa, u Modi u la kam ba tang lai tylli ki jingkieng la shna halor ka wah Brahmaputra la jan hynniew phew snem, hynrei ka sorkar jong u ka la shna phra tylli ki jingkieng kiba heh ha kine ki shi phew snem ba ladep. U la kdew ruh ia ka jingpynheh ha ki jingtei ha ka liang ka koit ka khiah, da kaba ong ba ka Assam mynta ka don 14 tylli ki medical college, bad sa 10 tylli ki dang don ha ka jingpynkhreh.
U myntri rangbah u la ong ba 11 lak ngut ki nongrep ha ka jylla ki la ioh jingmyntoi na ka skhim PM-Kisan bad pynskhem ba ki mat kum ki kam lehnoh bad ki kam thombor ki la duna bha.“Mynshwa ia ka Assam la tip tang na ka bynta ka sha, mynta yn sa tip na ka bynta ki Made-in-India semiconductor chips”, u la ong.
Ha ka jingialang kaba ar ba la pynlong ha Behali, Biswanath district, u Modi u la pynksan ia ka jingpynkup bor ia ki kynthei bad ka jingkiew ha ki jingtei, da kaba pynpaw ba 22 lak tylli ki iing la dep ban pynbiang hapoh ka PMAY, ha kaba la thmu ban pynbiang sa 15 lak tylli ha ki san snem ban wan.
U la pynbna ruh ïa ki jingthmu na ka bynta ka lynti rel ba nyngkong eh jong ka India hapoh wah hapoh ka wah Brahmaputra bad u la pynkynmaw biang ïa ki jingpyrshang ban ïakhun pyrshah ïa ka jingshlei um bad ka jingtwa khyndew.
Da kaba kynnoh ïa ka Congress ba ka la pynthut ïa ka jinglong jong ka Assam, u Modi u la kynnoh ba ka seng ka la pynshlur ïa ka jingwan buhai shnong bad ka jingthombor, kynthup ruh ha ki jaka Vaishnavite satra. U la ong ba ka sorkar BJP ka la leh pyrshah ia ki nongwan buhai shnong beain bad iada ia ki hok trai ri trai muluk, kynthup ia ka jingsam jaka hapoh ka Mission Basundhara.
Ha kaba iadei bad ki nongtrei ha kper slasha, u Modi u la ong ba ka BJP ka la shim ia ki sienjam ban pynbiang ia ki patta jaka bad ban pynbha ia ka jingsiew, da kaba kynnoh ba ki sorkar Congress kiba la dep ki la lehbein.
Ha kajuh ka por, u Pawan Khera, nongialam ka Congress, u la kynthoh pyrshah ia ka BJP, da kaba kynnoh ba ka la pynkiew dor ia ka LPG ban kamai ha ka por elekshon bad kam shym la lah ban pyndep ia ki jingkular ba la dep.
“Ka sorkar kaba la synshar la palat shi phew snem ka dang kren tang shaphang ka Congress.Ki briew jong ka Assam ki la thait”, la ong u Khera da kaba kynnoh ba ka dor jong ka umphniang bad ki marbam kin nang kiew shuh shuh hadien ka elekshon.
Ka jingthep vote na ka bynta ka elekshon sha ka iing dorbar thawain jong ka Assam, la buh ban long ha ka 9 tarik Iaiong, ha kaba ka jingialap elekshon, ka la nang jur ha kylleng ka Jylla.
