Nongpoh, Jymmang 06: Ki samla pule ka Them Ri-Bhoi kila shu shri iam bad sah ha ka umdum ha ka jingiakhun ia ka eksam National Eligibility cum Entrance Test [(NEET (UG) – 2024] ban ioh leit pule lain Medical, namar ka jingbakla jong ka National Testing Authority (NTA) ban pynpoi ia ki jingkylli kiba bakla sha ka Examination Code Centre (ECC).
Kane ka jingjia kala jia hapoh ka Alpha English Higher Secondary School, Nongpoh, kaba la ithuh da ka NTA kum ka Examination Code Centre bad la pyntip ba ki don haduh 63 ngut ki samla pule na Ri-Bhoi kiba leit thoh ia kane ka eksam (NEET) ba la pynlong hynnin ka Sngi U Blei, ka 5 tarik Jymmang.
Ka Shlem haba iakren bad ki samla pule ba leit iakhun ia kane ka eksam, kila iathuh ba kane ka Centre kala sam haduh ar set ki jingkylli sha baroh kiba iakhun ia ka eksam-kawei ka set jong ka State Bank of India (SBI) bad kawei jong ka Canara Bank.
Ki iathuh ba ka NTA kala buh por tang 3 kynta ban shong thoh eksam ha ka ban ioh leit pule lain Medical. Ki iathuh ba shuwa ban sdang ka thok eksam, kila iohpdiang ia baroh arset ki jingkylli hynrei ki kyndit pat ba hadien shikynta, u nongap eksam (invigilator), ula wan pyntip ba kawei ka jingkylli (set) ka dei kaba bakla bad ba ki samla pule kim dei ban thoh ne jubab ia kane ka jingkylli.
“Ha ka por ba ngi ioh ia ar set ki jingkylli shuwa ban sdang thoh, ngi la kylli ia u nongap eksam ba kano ka set kaba dei ban jubab hynrei une u nongap ula bthah ba kin thoh ia baroh arset. Hynrei tang hadien shikynta shiteng, ula bthah pat ia ki samla pule ba kawei ka set ka dei kaba bakla bad ba kim dei ba thok shuh” kila iathuh.
“Ki don bun ki samla pule kiba la kum thoh nyngkong ia ka set kaba bakla bad kine kila shu pynsyrwa kai ia ka por hynrei watla katta kila pyrshang katba lah ban jubab ia ka set kaba dei tang hapoh ka shikynta shiteng” kila bynrap.
Kine ki samla kila pynpaw ba namar ka jingkhum palat ka por ban jubab ia ka set kaba dei, jan baroh kim shym la lah shuh ban jubab ia baroh ki jingkylli kiba ki marks ki long haduh 720 marak namar ba kila bakla thok nyngkong ia ka set kaba bakla.
“Jan baroh ki samla pule kila mih na ka kamra thoh eksam da ka jingpang mynsiem bad bun ruh kila shri iam namar ka jingduhlad jong ki ban lehbha ia ka eksam tang na ka daw ka jingbakla sam ia ki jingkylli da ka Examination Code Centre” kila iathuh.
Ki Kmie Kpa haba ioh jingtip ia kaei kaba jia nala ki jong ki Khun, kila leit mareh wut wut sha ka Examination Centre ban iakren bad ban dawa ban ailad biang sa shisien ia ki Khun ba kin thoh ia ka eksam namar ka jingbakla ka dei na ka Examination Centre.
Ka Kong W.K Blah kaba dei ka bor pyniaid jong ka Alpha English Higher Secondary School, ka pyntip ba kane ka jingioh pdiang ka Centre ia artylli ki set-kawei ka SBI bad kawei jong ka Canara Bank, kala pynkulmar jingmut wat ia ki bor pyniaid ka Centre.
“Ngi la pyrshang ban iakren bad ki briew ka NTA hynrei ngi shym ioh iano iano ruh. Dei ha ka por bala sdang ka jingiathoh eksam, nga la ioh iakren ruh bad u Director Vijay Kumar uba pyntip ba kawei na ka set (jingkylli) ka dei ka bym donkam ia ki samla pule ban jubab bad kumta hi ngi la pyntip sha ki samla pule kiba mut thoh ia baroh artylli ki set (jingkylli)” kala iathuh.
Ka iathuh ba hynne ka sngi (6 tarik Jymmang), ki Kmie Kpa kila wan biang sha ka Centre ban ujor bad iakren bad la bthah ia ki Kmie Kpa ba kin thoh sha ki bor khmih ka NTA ha New Delhi ba kan ailad biang ia ki samla pule ka Ri-Bhoi ba kin ialeh ia kane ka samla sa shisien.
