Shillong, Jymmang 13 : Ka Jaintia Students’ Union (JSU) ha ka sngi Nyngkong, kala kyntu ia ki bor District ka West Jaintia Hills ban pynthikna ia ka jingpyniaid ryntih lang ha baroh ki Exemination Centre ha kane ka eksamin Common University Entrance Test (CUET) ban long la 15 haduh 18 tarik Jymmang.
Ha ka shithi sha u Deputy Commissioner ka District, ka JSU kala ong “Ngi la thoh ban pynpaw ia ka jingsngewkhia halor ka eksam CUET ban wan, ka ban long naduh ka 15 tarik haduh 18 tarik Jymmang bad kumta ngi kyrpad ia ka jingiarap jong phi ban pynthikna ia ka jingpyniaid ryntih lang ha baroh ki Exemination Centre hapoh ka District jong ngi”.
Kala ong ba haba khein kongsan ia ka eksam CUET ban saindur ia ka lawei ki samla pule ka Ri ha ka pule dangle, ka long kaba donkam ba hap don lypa ia ki lad ki lynti kiba pyrrkhing ban tehlakam ia kano kano ka jingleh bakla khnang ba kan nym jia kumba jia bad ka eksam NEET ba dang long shen.
“Namar katei ka jingjia ba dang shen, ngi kyrpad ia phi ban da peitngor bha bad pynthikna ba baroh ki Examination Centre kin pynthikna ba baroh kila shim ia ki lad ki lynti ba donkam ban khanglad ia kano kano ka jingleh bym hok. Kane ka kynthup ia ka jingpynthikna ban biang lut nadong hadong ki jingdonkam jong ki samla ba ialeh eksam, ka jingshngain jong ki tiar thoh eksam bad kiwei kiwei” ong ka shithi.
